CIA: jamal qashiqchini öltürüsh buyruqini seudi erebistan shdhzadisi chüshürdi

türkiye awazi radiyosi xewiri: amérika qoshma ishtatlirida chiqidighan «‹ Washington Post › géziti» ning,  bu heqtiki xewiride, merkizi axbarat teshkilati (CIA) ning seudi erebistanliq zhurnalist jamal qashiqchi jinayitini tekshürüsh jeryanida muhim delil – ispatlarni qolgha chüshürgenliki, jamal qashiqchini   öltürüsh buyruqini seudi erebistan text warisi shahzade muhemmed bin selmanning chüshürgenlikini éniqlap chiqqanliqi, tramp hökümitining muhemmed bin selman bilen bolghan munasiwetliriige ziyan yetmeslik üchün körsitiwatqan tirishchanliqlirining qiyinchiliq tughduruwatqanliqi ilgiri sürüldi.

xewerde déyilishiche, CIA jinayetni tekshürüsh jeryanida, shahzade muhemmed bin selmanning seudi erebistanning washington bash elchisi bolghan qérindishi xalid bin selmanning, jamal qashiqchi bilen birqanche qétim téléfonda körüshkenlikige alaqidar köpligen axbarat organlirining melumatlirini analiz qilish  netijiside shundaq yekün chiqarghan. xalid bin selman jamal qashiqchigha, seudi erebistanning istanbuldiki bash konsulxanisigha bérip, resmiyetlirini béjirishini, chünki buning téximu bixeter ikenlikini éytqan bolup, alaqidar tarmaqlar, xalidning bu jinayettin xewiri bar – yoqluqini bilmeydighanliqlirini, emma, xalidning muhemmed bin selmanning yolyoruqigha asasen jamal qashiqchigha shundaq dégenlikining éniq ikenlikini bildürgen.

melumatlargha qarighanda, seudi erebistanning washington bash elchixanisi bayanatchisi fatime bashén, xalidning jamal qashiqchining seudi erebistanning istanbuldiki bash konsulxanisigha bérishi toghruluq téléfonda sözleshmigenlikini, CIA ning yekünining «xata» ikenlikini ilgiri sürgen.

bu ariliqta, amérikiliq bir emeldar,  amérika qoshma ishtatlirining Associated Press (AP)  agéntliqining ziyaritini qobul qilghanda bergen bayanatida, «amérika axbarat organlirining mesulliri seudi erebistan text warisi shahzade muhemmed bin selmanning seudi erebistanliq zhurnalist jamal qashiqchini öltürüsh toghruluq buyruq chüshürgenlikini éniqlap chiqti» dégen.

seudi erebistan bash teptish emeldarining bayanatchisi shelan eshshelan, aldinqi küni élan qilghan bayanatida, jamal qashiqchining öltürülüshi weqesi bilen chétishliqi bar 5 kishige ölüm jazasi bérilishining telep qilinghanliqini éytqanidi.

u, text warisi shahzade muhemmed bin selmanning jamal qashiqchi jinayitidiki roli we melumatining bar – yoqluqigha munasiwetlik bir soalgha jawab bergende, muhemmed bin selmanning bu jinayet bilen héchqandaq alaqisi hem melumatining yoqluqini, seudi erebistanning istanbuldiki bash konsulxanisida yüz bergen ishlar heqqide uninggha xata doklat yollanghanliqini qeyt qilghanidi.