tramp firansiye pirézidéntining «yawropa qoshuni» teshkil qilish pikrini tenqid qildi

türkiye awazi radiyosi xewiri: tramp ammiwi ortaqlishish tor béti Twitter sehipiside, bu heqte élan qilghan bayanatida, makrongha inkas qayturup mundaq dédi: «makron yawropaning amérika qoshma ishtatliri, xitay we rusiyedin qoghdinish üchün özining qoshunini teshkil qilishining zörürlükini ilgiri sürmekte. emma, birinchi we ikkinchi dunya urushlirida yawropagha hujum qilghan dölet gérmaniye idi, undaqta, firansiye shu chaghda néme ish qilghan idi? u chaghda firansiyelikler amérika qoshma ishtatliri nijatkar süpitide yétip kélishtin burun parizhda némische öginishke bashlighanidi. ey firansiyelikler! ya burchunglarni shimaliy atlantik ehdi teshkilatigha ada qilisiler, ada qilmisanglar, buning aqiwitini körüsiler.»

tramp bu uchuridin kéyin élan qilghan birqatar uchurliridimu, makronning firansiye xelqining yéterlik derijide qollishigha érishelmigenliki üchün, jamaetchilikning nezirini bashqa terepki buruwétishke urunuwatqanliqini ilgiri sürüp mundaq dédi: «firansiyede makronni qollaydighanlarning nisbiti % 26 ge chüshüp qaldi, ishsizliq nisbiti % 10 ke bérip qaldi, shunga, bundaq halqiliq bir peytte, makron mesilini bashqa terepke buruwétishke urunmaqta. dunyada firansiyedinmu bekrek xelqi milletchi bir dölet yoq, firansiyelikler adette intayin ghururluq insanlardur, derweqe, ular buninggha layiqtur.»

 donald trampning uchurlirini özining shoarini firansiye üchün ishlitip, «firansiyeni qaytidin qudret tapquzayli!» teriqiside axirlashturushi diqqet qozghidi.

amérika qoshma ishtatliri pirézidénti donald tramp bilen firansiye pirézidénti émmanuél makron eng axirqi qétim «birinchi dunya urushi» ni axirlashturghan «urush toxtitish kélishimi» tüzülgenlikining 100 – yilliqi munasiwiti bilen yekshenbe küni parizhda ötküzülgen xatirilesh paaliyitide bir yerge jem bolghanidi.