b d t: «shimaliy koréyede insan heqliri hélihem nachar halette turmaqta»
b d t shimaliy koréye doklatchisi shimaliy koréyede insan heqliri ehwalining nachar ikenlikini bildürdi.
türkiye awazi radiyosi xewiri: birleshken döletler teshkilatida turushluq shimaliy koréye alahide doklatchisi tomas ojiya kiyintana, shimaliy koréyeni muhasire astigha éliwalghan siyasiy kilimatning özgergenlikini, lékin shimaliy koréyede insan heqliri ehwalining hélihem nachar ikenlikini bildürdi.
kiyodo agéntliqning bu heqtiki xewirige asaslanghanda, doklatchi tomas shimaliy koréye bilen jenubiy koréye we amérika otturisida chaqirilghan aliy rehberler yighini üstide toxtilip mundaq dégen: «xewpsizlik, tinchliq we parawanliq saheliride muhim ilgirilesh hasil bolghan bolsimu, lékin shimaliy koréyede insan heqliri ehwali burunqidek turmaqta.»
shimaliy koréyening weziyitide barliqqa kelgen özgirishler üstide toxtalghan tomas, insan heqliri saheside zor tirishchanliq körsitilishi lazimliqini eskertti.
jenubiy koréye pirézidénti mon jiyain bilen shimaliy koréye pirézidénti kim jongun, bu yil 27-aprélda ikki dölet chégrasigha jaylashqan panmunjom oq chiqirishni toxtitish yézisida körüshkenidi.
körüshüshtin kéyin élan qilinghan ortaq xitabnamide, koréye yérim arilini yadro qoralliridin tazilash we hazirqi oq chiqirishni toxtitish kélishimini uzun muddetlik tinchliq kélishimige özgertish üchün dawamliq muzakire ötküzüshte her ikki dölet pirézidéntining kélishkenliki uqturuldi.
mon bilen kim bu yil yene 26-mayda körüshüp, ikki dölet otturisda tinchliq ornitish mesilisi üstide muzakire ötküzdi.
ikki rehber yene piyongyongda körüshüp, ikki dölet otturisidiki sürkilishni peseytish mesilisi üstidimu kélishti.
piyongyangdiki körüshüshte ikki dölet otturisida tinchliq ornitish üchün ortaq tirishchanliq körsitish toghrisida wede bérishken mon bilen kim ortaq xitabname élan qildi. xitabnamide amérika tégishlik qedemlerni tashlighan teqdirde shimaliy koréyemu koréye yérim arilini yadro qoralliridin tazilash üchün téximu köp qedemlerni tashlaydighanliqi eskertildi.
yene bir tereptin, amérika pirézidénti donald tramp bilen kim jongun, bu yil 12-séntebirde singapurda körüshken bolup, körüshüshte her ikki rehber shimaliy koréyeni yador qoralliridin tazilash mesiliside kélishim hasil qildi.
