woks xewerler tori trampning kim jong ungha bergen wedisini ashkarilidi

türkiye awazi radiyosi xewiri: amérikining woks xewerler torida élan qilinghan aléks ward imzaliq xewer, amérika qoshma ishtatliri bilen shimaliy koréyening yéqinqi mezgillerdiki munasiwetlirige alaqidar muhim bir mesilini küntertipke élip kirdi.

xewerde, 12 – iyunda singaporda shimaliy koréye lidiri kim jongun bilen körüshken amérika pirézidénti donald trampning, mezkur uchrishishtin kéyinla «koréye urushigha qanuniy menide xatime béridighan bir tinchliq kélishimigha imza qoyush» toghrisida wede bergenliki, biraq aridin bir qanche ay ötüp ketken bolsimu, trampning bu wedisini ishqa ashurmighanliqi qeyt qilindi.

xewerde, trampning wediside turmasliqining piyongyang dairiliride ümidsizlik peyda qilghanliqi, shu wejidin yadro qoralsizlinish mesiliside shimaliy koréyening passip pozitsiyede bolushqa bashlighanliqi ilgiri sürüldi.

bu heqte woks xewerler torigha izahat bergen amérika tashqi ishlar ministirliqi, shimaliy koréye yadro qoralliridin xaliylashqan teqdirde, amérika qoshma ishtatlirining tinchliqperwer barliq diplomatik qedemlerni tashlashqa pütünley ochuq ikenlikini bildürdi, emma aqsaray hazirghiche bu heqte héchqandaq bayanat bermidi.

donald tramp bilen kim jongun 12 – iyunda singaporda körüshüp, shimaliy koréyening yadro qoralliridin xaliylashturulushi mesiliside birdeklik hasil qilghanidi. biraq, uchrishishtin kéyin ikki dölet arisidiki diplomatik atmusféra buzulushqa bashlighan, amérika terep shimaliy koréyeni yadro pilanidin waz kechmeslik bilen eyibligenidi.

jenubiy koréye bilen shimaliy koréye arisida 1953 – yili imzalanghan urush toxtitish kélishimining rohigha asasen urush toxtighan bolsimu, bir tinchliq kélishimi imzalanmighanliqi üchün, urush emeliy menide hélihem dawamlishiwatidu, dep qarilidu.