kanada bilen seudi erebistanning munasiwiti keskinleshmekte
kanada hökümiti seudi erebistanning qararliridin tolimu epsuslanghanliqini bildürüp bayanat élan qildi.
türkiye awazi radiyosi xewiri: kanada hökümiti seudi erebistan dairlirining kanada elchisini chégradin qoghlap chiqirishidin tolimu epsuslanghanliqini bildürdi.
kanada tashqi ishlar ministiri kiristiya firélend seudi erebistan bilen kanadaning nöwettiki munasiwiti üstide yazma bayanat élan qildi.
ministir kiristiya firélend bayanatida mundaq dédi: «seudi erebistanning elchimizni chégradin qoghlap chiqirishidin tolimu epsuslanduq, seudi erebistan hökümiti insan heqliri paaliyetchilirini nazaret astigha aldi, hökümitimiz buninggha naraziliq bildürdi, biraq seudi erebistan dairliri elchimizni chégradin qoghlap chiqardi. kanada ayallarning heq-hoquqliri, pikir erkinliki bolup barliq insan heqlirining qoghdilishi üchün her daim küch chiqiridu. bu qimmet ölchemlirini dadilliq bilen teshebbus qilip kéliwatimiz, diyalogning xelqara diplomatiyediki rolining zorliqigha ishinimiz. kanadaning seudi erebistandiki elchixanisi we konsolxanisi ongushluq xizmet ishlewatidu. kanada insan heqlirini qoghdaydu we dunya miqiyasida bu qimmet ölchemlirini yaqlap kéliwatqan batur ayallar we erlerge xizmet qilidu.»
seudi erebistan bixeterlik dairlirining bezi insan heqliri paaliyetchilirini nazaret astigha élishigha qarita kanada hökümiti naraziliq bildürüp bayanat élan qildi, bu ehwal ikki dölet arisida diplomatik kirizis peyda qildi.
seudi erebistan hökümiti tünügün kanadaning riyad elchisini xalimighan kishi élan qilip, 24 saet ichide chégradin chiqip kétishi üchün möhlet bergendin bashqa, kanada bilen bolghan barliq soda munasiwitini tonglitip qoydi.
riyad hökümiti yene kanada bilen maarip saheside ornatqan hemkarliq munasiwitinimu toxtatti, hetta seudi erebistan awiatsiye shirkitining 13-awghusttin bashlap kanadaning toruntu shehirige qatnaydighan ayropilan seperlirinimu bikar qiliwetti.
