دائېش رەھبىرى باغدادىنىڭ ئوغلى ئۆلتۈرۈلدى

تۈركىيە ئاۋازى رادىيوسى خەۋىرى: تېررورلۇق تەشكىلاتى دائېشنىڭ تەتۈر تەشۋىقات ئۈچۈن ئىشلىتىۋاتقان مېدىيا ئورگىنى تەرىپىدىن ئېلان قىلىنغان باياناتتا، ئەلبەدرىنىڭ ھۇمۇس شەھىرىدىكى بىر ئېلېكتىر ئىستانسىسىدا ئۆلتۈرۈلگەنلىكى بىلدۈرۈلدى.

باياناتتا، ئەلبەدرىنىڭ ھۇمۇستا نۇسەيرىلەرگە ۋە رۇسىيەگە قارشى ئېلىپ بېرىلغان ھەرىكەت جەريانىدا ئۆلتۈرۈلگەنلىكى ئۇقتۇرۇلدى.

دائېشنىڭ ئاتالمىش رەھبىرى باغدادىنىڭ ئۆلتۈرۈلگەنلىكىگە دائىر قانچىلىغان قېتىم خەۋەر قىلىنغان بولسىمۇ، ئەمما تېخىچە ئېنىقلانمىغان بولۇپ، ئاقىۋىتىنىڭ زادى قانداق بولغانلىقى ھەققىدە ھېچقانداق رەسمىي مەلۇمات يوق.

بىراق، دائېشنىڭ بۇ قېتىمقى خەۋىرىدە باغدادىنىڭ ھايات ئىكەنلىكى ئىما قىلىندى.

بۇنىڭدىن ئىلگىرىمۇ دائېش باغدادىغا تەۋە ئىكەنلىكى ئىلگىرى سۈرۈلگەن بىر ئاۋاز لېنتىسىنى ئېلان قىلغان ئىدى.