xitayda ikki yighin bashlinidu

türkiye awazi radiyosi xewiri: xitaydiki eng yuqiri qanun chiqirish orgini hésablinidighan xitay memliketlik xelq qurultiyi we memliketlik siyasiy meslihet kéngishining ete (3-mart) bashlinidighan yilliq yighinlirida, döletning kelgüsidiki besh yilini shekillendüridighan rehberlik qoshuni békitilgendin bashqa, qanun we islahatlar heqqide qarar chiqirilidu.

yighin paytext béyjingdiki tyenmén meydanigha jaylashqan xelq chong sariyida échilidu. yighingha, dölet reisi shi jinping, bash ministir li kéchyang, aptonom rayon we her qaysi ölke hemde az sanliq milletlerning wekilliridin bolup, jemiy 2980 wekil qatnishidu.

ikki yighin déyilidighan bu yighinlar, 3-martta memliketlik siyasiy meslihet kéngishining, 5-martta xitay memliketlik xelq qurultiyining échilish murasimliri bilen bashlinidu we texminen ikki hepte dawamlishidu.

xitay memliketlik xelq qurultiyi we xitay memliketlik siyasiy meslihet kéngishining 13-nöwetlik 1-omumiy yighini hésablinidighan bu yighilishta, xitay kompartiyesining 19-qurultiyida partiye sikrétari bolghan shi jinping, ikkinchi nöwetlik besh yilliq dölet reislik wezipisini resmiy tapshuruwalidu.

bu yighinlarda, xelqaraliq jemiyetler diqqet bilen közitiwatqan iqtisadtin sodighiche, siyasettin dölet mudapiesigiche, sehiyedin maaripqiche bolghan nurghun saheler boyiche muhim islahat témiliri muzakire qilinidu we bu heqte qarar chiqirilidu.

merkiziy hökümetke siyaset jehettin pikir-meslihet béridighan xitay siyasiy meslihet kéngishi wekilliri jemiyetke, 5-marttiki memliketlik xelq qurultiyida muzakire qilinidighan mesililerge munasiwetlik yip uchi béridu.

xitay bash ministiri li kéchyang memliketlik xelq qurultiyining échilishida, hökümetning yilliq xizmet doklatini sunidu we hökümetning xamchot pilanini élan qilidu.

yighin ariliqida, xelqaraliq jemiyet zor qiziqish ichide kütüwatqan témilarning béshida turidighan xitay hökümitining 2018-yilliq iqtisadiy éshish texminiy reqemliri bilen dölet mudapiesi xamchoti élan qilinidu.

xitay hökümiti kompartiye 19-qurultiyida 2017-yilidiki iqtisadiy éshish nisbitini %6.5 dep élan qilghan bolsimu, %6.9 ashqan idi.

yighinda amérikani öz ichige alghan nurghun döletler yéqindin közitip kéliwatqan dölet mudapie xamchotigha munasiwetlik élan qilinidighan bayanatlar, töt köz bilen kütülüwatqan témilar qataridin orun alidu.

xitay hökümiti 2017-yili herbiy xirajetlerni %7 ashurup, 152 milyard dollargha chiqarghan idi.

süriye we shimaliy koréye mesililiri, hindistan bilen bolghan chégra mesililiri, amérika bilen bolghan munasiwetler, jenubiy déngizdiki igilik hoquq ixtilapliri qatarliq tashqi siyasetning küntertip mesililirimu muzakire qilinidighan bu yighinlarni, 3 mingdin artuq yerlik we chet el muxbirlirining yéqindin közitidighanliqi perez qilinmaqta.