zarif: amérika «yadro kélishimi» ge riaye qilsa iranmu riaye qilidu
iran tashqi ishlar ministiri muhemmed jewad zarif amérika qoshma ishtatliri «yadro kélishimi» ge riaye qilsa iranningmu riaye qilidighanliqini éytti.
türkiye awazi radiyosi xewiri: zarif tünügün bélgiyening paytexti biryussélda yawropa ittipaqi tashqi munasiwetler we bixeterlik siyasetliri alahide wekili fédérika moghérini, firansiye tashqi ishlar ministiri yén ywés lé drian, gérmaniye tashqi ishlar ministiri sigmar gabriél we engliye tashqi ishlar weziri boris jonson bilen ötküzgen axbarat élan qilish yighinidin kéyin iranning döletlik téléwiziye qanili « IRIB» ning ziyaritini qobul qilghanda bergen bayanatida, mundaq dédi: «yawropa ittipaqigha eza 3 dölet bilen yawropa ittipaqi tashqi munasiwetler we bixeterlik siyasetliri alahide wekili fédérika moghérini iranning yadro kélishimi dairisidiki heq – hoquqlirining küchke ige ikenlikini bildürdi. dölitimiz yadro kélishimining maddilirigha özgertish kirgüzülüshini qetiy qobul qilmaydu. bu heqte élip barghan uchrishshishlirimizdimu bu nuqtini alahide tekitlep kéliwatimiz. amérika yadro kélishimige riaye qilsa, iranmu riaye qilidu.»
iran bilen (amérika, engliye, xitay, firansiye, rusiye we gérmaniye qatarliq) 5+1 döletliri otturisida 2015 – yili imzalanghan yadro kélishimi we ortaq heriket pilani dairiside biryussélda tünügün chaqirilghan yighindin kéyin bayanat élan qilghan fédérika moghérini, iranning yadro kélishimige sadiq ikenlikini hemde yawropa ittipaqining ortaq heriket pilanini qoghdash iradisining qetiylikini eskertkenidi.
amérika pirézidénti trampning shu künlerde yadro kélishimige alaqidar qararini élan qilishi kütülmekte.
