«iran xelqining yighilish we söz erkinlikige hörmet qilinishi lazim»
birleshken döletler teshkilati iran xelqining yighilish we söz erkinlikige hörmet qilinishi lazimliqini bildürdi.
türkiye awazi radiyosi xewiri: birleshken döletler teshkilati irandiki namayishlar toghruluq bayanat bérip, iran xelqining tinch namayish ötküzüsh we söz erkinliki hoquqigha hörmet qilinishi lazimliqini bildürdi.
b d t bash katipi bayanatchiliridin parhan heq kündilik waqiplandurush yighinida bash katip antonyo gutrrésning iranning nöwettiki weziyitini yéqindin közitip kéliwatqanliqini we iran hökümiti yaki bashqa döletler bilen iranning hazirqi ehwali üstide kéngesh ötküzüshni oylishiwatqanliqini éytti.
b d t ning qandaq ishlarning weziyetni ongshashqa paydisi tégidighanliqi üstide kéngesh ötküzüwatqanliqini, shundaqla iranda buningdinmu éghir zorawanliq weqelirining yüz bermeslikini ümid qilidighanliqlirini eskertken heq munularni dédi: « b d t iranliqlarning yighilish we söz erkinlikige hörmet qilinishini kütidu.»
irandiki qalaymiqanchiliq bultur 28-dékabirda meshhed shehiride bir türküm kishining mal bahasining yuqirliqi, ishsizliq we chiriklik qatarliq mesililerge naraziliq bildürüp namayish ötküzüshi bilen bashlidi.
qisqa waqit ichidila hakimiyetke qarshi heriketlerge özgirip ketken naraziliq namayishliri téhran, kermashah, senendech, zenjan, shiraz, qum, exwaz, zahidan, eraq we hurrem abad qatarliq sheherlerge kéngeydi.
iran miqiyasida yüz bergen namayishlarda hazirghiche eng az 23 adem öldi, 500din artuq adem nazaret astigha élindi.
