somalining paytexti yene qangha boyaldi
somalining paytexti muqdishoda adem bomba hujumi yüz bérip nurghun adem öldi.
türkiye awazi radiyosi xewiri: somalining paytexti muqdishoda bomba qachilanghan aptomobil bilen qilinghan hujumda 18 adem öldi.
saqchi idarisi mesulliridin muhemmed hüseyin muqdishoning hamruweyni mehellisidiki naso hablod méhmanxanisini hujum nishan qilinghan hujumda 13din artuq ademning ölgenlikini bildürdi.
zorawanlardin birining üstige téngiwalghan bombini partlatqanliqini éytqan hüseyin, partlashtin kéyin qalghan zorawanlar bilen méhmanxanining bixeterlik xadimliri otturisida toqunush yüz bergenlikini qeyt qildi.
hüseyin zorawanlarning ikkisining bixeterlik xadimliri teripidin étip öltürülgenlikini, qalghan zorawanlarning bolsa qol bombisi étip méhmanxanining tok liniyesini üzüp tashlighanliqlirini éytti.
saqchi tarmaqlirining bildürüshiche, deslepki partlashtin kéyin meshhur esker meydani we kona parlamént binasigha yéqin jaygha toxtilip qoyulghan bomba qachilanghan aptomobil partiltilghan.
yerlik dairilerning bildürüshiche, bir heyet mezkur méhmanxanida somali pirézidénti muhemmed abdullah fermaju bilen yighin ötküzüsh üchün muqdishogha qarap yolgha chiqqan iken.
tunji hujumning jawabkarliqini térrorluq teshklati esh-shebab üstige alghan bolsa, ikkinchi qétimliq hujumning jawabkarliqini hazirghiche héchkim üstige almidi.
