rusiyede öktichi rehber qamaq jazasigha höküm qilindi
rusiyede öktichi rehber alékséy nawalni qanungha xilapliq qilish bilen eyiblinip 30 künlük qamaq jazasigha höküm qilindi.
türkiye awazi radiyosi xewiri: rusiyening köpligen sheherliride minglarche kishi pirézidént wiladimir putingha qarshi chiqish bilen tonulghan «chiriklikke qarshi küresh fondi» ning qurghuchisi we kishilik hoquq paaliyetchisi alékséy nawalning chaqirigha awaz qoshup namayish ötküzdi.
paytext moskwada ötküzülgen namayish harpisida öyining aldida qolgha élinghan nawalni, yighilishlargha munasiwetlik qanun – belgilimilerge xilapliq qilish bilen eyiblinip 30 künlük qamaq jazasigha höküm qilindi.
ruxsetsiz bolghanliqi sewebidin hökümetke qarshi namayish ötküzülüshige yol qoymighan saqchilar hökümetqa qarshi shoar towlighan namayishchilargha mudaxile qildi.
moskwa we bashqa sheherlerdiki 50 jayda ötküzülgen namayishlarda 1500 kishi qolgha élindi.
nawalning chaqiriqigha awaz qoshup mart éyida moskwada ötküzülgen namayishlardimu minggha yéqin kishi qolgha élinghan, nawalnimu saqchilargha itaet qilmasliq bilen eyiblinip 15 künlük qamaq jazasigha höküm qilinghanidi.
putinning eng küchlük reqibi dep qariliwatqan 41 yashliq nawalni aprélda yüzige yéshil bir suyuqluq buyum étilghandin kéyin közidin ayrilip qalghan, 2013 – yili 5 yilliq qamaq jazasigha höküm qilinghanidi.
yawropa kishilik hoquq mehkimisining qararigha asasen rusiye aliy sot mehkimisi dewaning tekrarlinishi toghruluq qarar chiqarghanidi.
igilinishiche, mehkimining qarari mueyyenleshken teqdirde, nawalni kéler yili ötküzülidighan pirézidént saylimida putingha qarshi namzat bolalmaydiken.
bu ariliqta, amérika qoshma ishtatliri nawalnining qolgha élinishi we rusiyediki ammiwi qolgha élish heriketlirige naraziliq bildürdi.
aq saray bayanatchisi sén spaysér bu heqte élan qilghan bayanatida, rusiyediki ammiwi qolgha élinish heriketlirini qattiq eyiblidi hemde rusiye dairiliridin tinch namayish ötküzgen barliq namayishchilarni derhal qoyup bérishni telep qildi.
yawropa ittipaqi we xelqara kechürüm teshkilatimu rusiyediki qolgha élinish weqelirige qattiq naraziliq bildürdi.
yawropa parlaméntining bashliqi antonio tajani nawalnining qolgha élinishni «endishilik ehwal» dep atidi, xelqara kechürüm teshkilati namayishchilarning qolgha élinishini qattiq eyiblep, rusiyede endishe signallirining chéliwatqanliqini bildürdi.
مۇناسىۋەتلىك خەۋەرلەر
