qatar émbargoning qurbanliri üchün tölem telep qilishqa teyyarlanmaqta

türkiye awazi radiyosi xewiri: hökümetke qarashliq memliketlik kishilik hoquq komitéti bashliqi eli bin damir elmerri muxbirlarni kütüwélish yighini ötküzüp, seudi erebistan, ereb birleshme xelipiliki we behreynning hawa teweliklirini qatargha taqiwétishi we yolgha qoyulghan muhasirining tesirige uchrighan qatar we pars qoltuqi kéngishige eza ellerning puqralirigha tölem tölinishini kapaletke ige qilish üchün, xelqara qanun biyurosi bilen kélishim tüzülidighanliqini uqturdi.

elmerri, xelqara qanun biyurosining erz sunush arqiliq bu döletlerning yerlik sot mehkimiliri wasitisi bilen mewjut ziyanlarni tölinishini telep qilidighanliqini, bu döletlerdiki sot mehkimiliri mesuliyitini ada qilmighan teqdirde, xelqaraliq kélishimlerde körsitilgen «ziyanning tölinishi» pirinsipigha asasen, xelqara mehkimilerge erz sunulidighanliqini qeyt qildi.

mezkur qararlargha «kolléktip halda jazalash we xelqaraliq jinayet» dep baha bergen elmerri, komitétning pars qoltuqidiki kirizistin kéyin 700 shikayet tapshurup alghanliqini we échinishliq aile mesililirining otturigha chiqqanliqini tilgha alghan halda, bu ehwalni qobul qilish we uninggha süküt qilip turushning mumkin emeslikini bildürdi. u, qatar memliketlik kishilik hoquq komitétining seudi erebistan, ereb birleshme xelipiliki we behreyndiki kishilik hoquq organliri bilen téléfonda körüshüp, muhasire tüpeyli qatar we bu üch dölet puqraliri duchar bolghan naheqchiliklerni hel qilishning yollirini izdeshni telep qilghanliqini qeyt qildi.