ruméniyede hökümetning qanun teklipige qarshi namayishlar dawamlashmaqta

türkiye awazi radiyosi xewiri: ruméniye hökümiti naraziliqlarning küchiyishi sewebidin qanun teklipini qayturuwalghan bolsimu, buxarésttiki namayishlargha bashqa sheherlerdin kelgen 200 mingdin artuq kishi qatnashti. namayishchilar hökümetni istépa bérishke chaqirip, jazasi besh yildin az qalghan mehbuslarni kechürüm qilish tekliplirining dölette parixorluqni téximu köpeytiwétidighanliqini ilgiri sürmekte.

ruméniyede paytext buxarétsttin bashqa sheherlerdimu namayishlar ötküzüldi. bash ministir sorin grindéyanu özining milyonlarche awaz bilen saylanghanliqini we hökümetning siyasetlirini ijra qilish üchün saylighuchilarning ishench awazini alghanliqini bildürüp, istépa bermeydighanliqini uqturdi.

bash ministir grindéyanu shenbe (4-féwral) küni bir qanche kündin buyan ötküzülüwatqan namayishlarning tesiride, naraziliqlargha duch kelgen qanun teklipini emeldin qaldurushni muzakire qilidighanliqlirini élan qilghan idi. tünügün (5-féwral) échilghan hökümet yighinida, kechürüm qilish we jaza qanunigha özgertish kirgüzüsh qanun teklipi emeldin qalduruldi.

22-yanwar bashlanghan namayishlar sewebidin emgek we soda-sanaet ministiri florin nikolaé jiyanu xizmitidin istépa bergen idi. namayishlarni ruméniye pirézidéntimu qollidi.