üch ministir moskwa yighinidin kéyin ortaq bayanname élan qildi
türkiye tashqi ishlar ministiri mewlüt chawushoghlu, rusiye tashqi ishlar ministiri sérgéy lawrow we iran tashqi ishlar ministiri jewad zarif moskwa yighinidin kéyin süriye kirizisi toghruluq ortaq bayanname élan qildi.
türkiye awazi radiyosi xewiri: bayannamide, iran, rusiye we türkiyening étnik milliti, dini we mezhipi qandaq bolushidin qetiynezer süriyening igilik hoquqi, musteqilliqi, birliki we zémin pütünlükige hörmet qilidighanliqi, her üch terepning süriye kirizisini herbiy yollar arqiliq hel qilish mesiliside ortaq tonush hasil qilghanliqi eskertildi.
süriye kirizisini hel qilishta birleshken döletler teshkilatining xewpsizlik kéngishining 2254 – nomurluq qararigha asasen körsitiwatqan tirishchanliqlirining nahayti zor ehmiyetke ige ikenliki tekitlengen bayanatta, xelqara jemiyet moskwa yighinida hasil qilinghan birdeklikning aldidiki tosalghularni bikar qilish üchün tirishchanliq körsitishke chaqiriq qilindi.
bayanatta mundaq déyildi: «türkiye, iran we rusiye sherqiy helebtin puqralar we qoralliq öktichilerni ongushluq halda yötkesh mesiliside körsitiliwatqan ortaq tirishchanliqlardin intayin xursen. buningdin bashqa yene, ministirlar fua, kefreya, zebadani we madayadiki puqralarning bixeter halda yötkilishidin memnun. üch terep bu basquchning bixeter we muweppeqiyetlik halda tamamlinidighanliqi toghruluq wede berdi.»
puqralarni yötkesh basquchida xelqara qizil kirést jemiyiti we dunya sehiye teshkilatining bergen yardemlirining nahayiti muhimliqi tekitlengen bayannamide yene mundaq déyildi: «üch ministir urush toxtitish, sijil insanperwerlik yardem we puqralarning erkin sayahet qilishini keng omumlashturush mesilisidimu ortaq tonush hasil qildi. türkiye, rusiye we iran süriye hökümiti bilen öktichiler otturisida söhbet ötküzüshini qolgha keltürüsh nishan qilinghan kélishimge képil bolushqa teyyar bolup, sahediki özgirishlerge nisbeten nopuzi bar ellernimu shundaq qilishqa chaqiridu.»
bayannamining axirida mundaq déyildi: «terepler bu kélishimning birleshken döletler teshkilati xewpsizlik kéngishining 2254 – nomurluq qararigha asasen süriye kirizisini siyasiy yollar arqiliq hel qilish üchün dawamliq tirishchanliq körsitish mesiliside ortaq tonush hasil qildi. ministirlar qazaqistan pirézidéntining bu heqte astanede türlük yighinlarni chaqirish toghruluq bergen teklipining nahayti zor ehmiyetke ige ikenlikini tekitlidi. shuning bilen bir waqitta, üch terep, daésh we ennusrege qarshi ortaq küresh qilish we qoralliq öktichi guruppilarni bu teshkilatlardin ayrish iradilirining qetiy ikenlikini bildürdi.»
مۇناسىۋەتلىك خەۋەرلەر
