idlibtiki bir mektep arqa - arqidin bombardiman qilindi
b d t balilar yardem fondi bayanat bérip, idlibtiki bir mektepning arqa – arqidin hujumgha uchrighanliqini bildürdi.
türkiye awazi radiyosi xewiri: suriyening idlib shehiridiki bir mektep bombardiman qilindi؛ bombardimanda 22 oqughuchi hayatidin ayrildi.
b d t balilar yardem fondi bayanat bérip, idlibtiki bir mektepning arqa – arqidin hujumgha uchrishishi netijiside 22 oqughuchi bilen 6 oqutquchining hayatidin ayrilghanliqini bildürdi. bayanatta, hujumning suriyede 5 yildin buyan dawamlishiwatqan ichki urush jeryanida bir mektepke qilinghan qanliq hujumlarning biri ikenliki tekitlendi.
xelqara jemiyetning «bu wehshiylikke qachan <toxta> deydighanliqi» soralghan bayanatta, «bu bir tiragédiye. bu peskesh hujum eger qesten qilinghan bolsa, bu bir urush jinayitidur» dégen ibarilerge orun bérildi.
hujumni idlibke hawadin hujum qiliwatqan esed hakimiyiti küchliri yaki rusiyening qilghan bolushi éhtimalining barliqi ilgiri sürülmekte.
b d t xewpsizlik kéngishi yighinida, muxbirlarning bu dewalargha dair soallirigha jawab bergen rusiyening b d t da turushluq daimiy wekili witaliy churkin, moskwaning suriyede mektep bombardiman qilmighanliqini bildürüp, «qorqunchluq bir xewer, biz bilen alaqisi bolmasliqini ümid qilimen. méning <undaq ish yoq> déyishim asan, lékin mesuliyetchan biri bolush süpitim bilen, mudapie ministirliqi néme deydu, qarash kérek» dégenidi.
