kanadada béshini échishni ret qilghan musulman oqughuchi imtihandin qoghlap chiqirildi
kanadaning montréal shehiride bir xususiy mektepning oqutquchisi béshini échishni ret qilghan musulman oqughuchisini imtihan meydanidin qoghlap chiqardi.
türkiye awazi radiyosi xewiri: College de Maisonneuve mektipide meydangha kelgen weqe toghruluq xewer talqalghandin kéyin, mektep bayanatchisi Line Legare bayanat élan qilip mundaq dédi: «weqe biyologiye oqutquchimiz oqush bashlanghan haman uqturghan, <imtihan jeryanida oqughuchilarning shepke (bash kiyimi), uzun chach yaki yaghliq arqiliq qulaqlirini yépishqa bolmaydu> teriqisidiki belgilimige xilap qilinghanliqi tüpeyli yüz berdi. oqutquchimiz bu belgilimini oqughuchilarning imtihanda qulaqliq ishlitip köchürmikeshlik qilmasliqi üchün chiqarghanidi.»
Legare ismi élan qilinmighan musulman qiz oqughuchi étiqadining teqezzasigha asasen béshini achalmaydighanliqini éytqandin kéyin, oqutquchisining uni imtihandin chiqarghanliqini qeyt qildi.
weqening oqutquchigha nisbetenmu biaramliq ish ikenlikini eskertken Legare oqughuchining bashqa waqitta imtihangha kirishi üchün oqutquchisi bilen muzakire élip bériwatqanliqini éytti hemde uning bu heqte shikayette bolmighanliqini, mektep mudiriyitining bundaq weqening qayta yüz bermesliki üchün xizmet ishlewatqanliqini tekitlidi.
yene bir tereptin, kwibék ishtatining bash ministiri filipé kwilad bu heqte élan qilghan bayanatida, oqutquchi pirinsipta ching turghanliqi üchün shundaq weqe yüz bergenlikini tekitlep mundaq dédi: «weqening bashlanghan yerde hel bolghanliqigha söyündüm. nöwette biz tüzüwatqan we yéqinda parlaméntqa sunulidighan bir qanun layihesi bundaq weqelerni téximu tepsiliy talash - tartish qilishqa zémin hazirlap béridu.»
