amérika rusiye sewebidin süriye muzakirilirining toxtitip qoyulghanliqini bildürdi

türkiye awazi radiyosi xewiri: amérika qoshma ishtatliri rusiye bilen birlikte ötküzüp kéliwatqan süriyede urush toxtitish muzakirilirining toxtitilghanliqini bildürdi.

bu heqte bayanat bergen amérika tashqi ishlar ministirliqi bayanatchisi jon kirbay, bu qararning asan élinmighanliqini, rusiye bilen esed hakimiyitining barliq agahlandurushlarning eksiche, puqralarni qetli qilishni dawamlashturup kéliwatqanliqlirini we bergen wedilirini ishqa ashurmaywatqanliqlirini éytti.

kirbay süriyediki ashqun unsurlargha zerbe bérish üchün keng kölemlik herbiy heriket bashlighanliqlirinimu sözlirige ilawe qildi.

jon kirbayning bu sözlirige rusiye mensebdéshi mariya zaharowa derhal jawab qayturdi. u süriyede urush toxtitishni ishqa ashurush üchün 9 madda boyiche amérika hakimiyiti bilen kélishim hasil qilip, shuninggha asasen qedem tashlighanliqlirini, eslide wedisini boyiche ish tutmighanlarning amérika hakimiyiti ikenlikini , biraq amérikining rusiyeni eyibligenlikini bildürdi.

rusiye tashqi ishlar ministiri sérgéy lawrow ilgirimu amérika bilen hasil qilghan süriye kélishimlirining «washingiton hakimiyitining pozitsiyesidiki müjmellik»sewebidin toxtitip qoyulghanliqini éytqanidi.

urush toxtitish kélishimi yolgha qoyulmay kéliniwatqan süriyede weziyetning qaysi yönilishke qarap qandaq tereqqiy qilishi hazirche namelum.

rusiye bilen esed hakimiyiti heleb bilen hamadiki doxturxanilargha hujum qilghandin kéyin, amérika bilen rusiye otturisidiki sürkilish küchiyip ketti.

birleshken döletler teshkilati bash katipi ban kimunmu, süriye mesilisining süriye xelqi, küchlük döletler we b d t xewpsizlik kéngishi qatarliq üch sahege tarqap bölünüp ketkenlikini tekitlep munularni dédi: «bu ehwallar shiddetlik boran-chapqun keltürüp chiqiridu.»

bu ariliqta, amérikigha tewe bir uchquchisiz ayropilanning bombardimanlirida idlibte el nusra kattiwashliridin ebu faraj öldi.