gérmaniye hökümiti médiyalarni türkiye toghruluq tetür teshwiqat qilish bilen eyiblidi

türkiye awazi radiyosi xewiri: gérmaniye hökümiti türkiye toghruluq élan qilinghan tetür teshwiqat xaraktérlik xewerlerni tenqid qildi.

gérmaniye hükümet bayanatchisi sitéfén séybért, gérmaniye médiyasidiki türkiyege qaritilghan tetür teshwiqatlarni we türkiyeni«térrorizimni qollash»bilen eyibleshlirini tenqid qilip mundaq dédi: «türkiye térrorizimgha qarshi küreshte bizning nahayiti muhim ittipaqdéshimiz bolup keldi, buningdin kéyinmu mushundaq bolidu.»

séybért muxbirlarni kütüwélish yighinida ARD téléwziye qanilining hökümetning bir partiyening parlaméntta sorighan soaligha  bergen jawabini xewer qilghanda, türkiyening musulman qérindashlar we hamasqa oxshash teshkilatlarni qollishini «ottura sherqtiki térrorluq teshkilatlirini qollash»dégen teriqide burmilishi üstide toxtildi.

bir sol partiyening parlaménttiki sorighan soaligha hökümetning bergen jawabidiki bezi melumatlarning yoshurun tutulushi kéreklikini, bu sewebtin mezmuni toghruluq izahat bérelmeydighanliqini éytqan séybért, buninggha munasiwetlik médiyada xewer qilinghan türkiye toghruluq xewerlerning asassiz ikenlikini eskertti.

türkiyening weziyiti nahayiti murekkep bir rayongha jaylashqanliqini, nurghun qétim ottura sherqtiki térrorluq teshkilatlirining hujumlirining nishani bolghanliqini eslitip ötken sitéfén séybért mundaq dédi:

«bizge nisbeten türkiye daéshqa qarshi küreshlerde eng muhim ittipaqdash dölettur.»

rayondiki térrorluq teshkilatlirining hem türkiye, hem gérmaniye hemde yawropagha tehdit ikenlikini, bu tehditke peqet xelqara sahede téximu yéqin hemkarliq ornitish arqiliq taqabil turghili bolidighanliqini eskertken hökümet bayanatchisi mundaq dédi: «türkiye térrorizimgha qarshi küreshte muhim ittipaqdash dölet bolup keldi, buningdin kéyinmu ittipaqdash bolushni dawamlashturidu.»

tashqi ishlar ministirliqi muawin bayanatchisi sawsan cheblimu muxbirlarni kütüwélish yighinida, türkiye toghruluq parlaméntta soralghan soallargha bérilgen jawablarni teyyarlashta, tashqi ishlar ministirliqining bu heqtiki qarashlirining soralmighanliqini éytip mundaq dédi: «médiyalarda türkiye toghruluq élan qilinghan xewerlerni qobul qilalmaymiz.»

türkiye bilen gérmaniye otturisida pat-pat pikir oxshimasiqi kélip chiqidighanliqini éytqan chebli, türkiyening gérmaniyege nisbeten muhim ittipaqdash dölet ikenlikini, bu ittipaqliqning nato we süriyege oxshash mesililerde namayen bolghanliqini qeyt qildi.

 ichki ishlar ministirliqi bayanatchisi johannés dimros, ministirliq teripidin teyyarlanghan  türkiyege munasiwetlik soalgha bergen jawabning, alaqidar bashqarmining xataliqi sewebidin, tashqi ishlar ministirliqining bu heqtiki pikirliri soralmastin, fédral mejliske ewetilgenlikini éytti.

dimros gérmaniyege nisbeten térrorizimgha qarshi küreshte türkiye bilen bolghan hemkarliqning tolimu muhim ikenlikini tekitlep mundaq dédi: «bizning ichki bixeterlik tarmaqlirimiz nuqtisidinmu türkiye daéshqa qarshi küreshlerde eng muhim ittipaqdash dölet hésablinidu.»

türkiye bilen bixetelik sahesidiki hemkarliqning bezide qiyin ehwalgha chüshüp qalidighanliqini étyqan dimoros mundaq dédi: «yéqindin buyanqi hemkarliqimizda körinerlik ilgirileshler meydangha keldi.»

dimros gérmaniye dairlirining qanun dölitining teqezzasi boyiche bezi mesililerde sezgür bolushliri kéreklikini, türkiye bilen bolghan hemkarliqtimu mushu boyiche heriket qilghanliqlirini sözlirige ilawe qildi.