yaponiye bir hepte ichide xitayni ikkinchi qétim agahlandurdi

türkiye awazi radiyosi xewiri: yaponiye bir hepte ichide xitayni ikkinchi qétim agahlandurdi؛ yaponiye sherqiy xitay déngizidiki detalashliq arallar yüzisidin munasiwetlerning yirikliship ketmesliki toghrisida xitayni agahlandurdi.

yaponiye tashqi ishlar ministirliqi bügün (seyshenbe) bayanat élan qilip, tashqi ishlar ministiri fumio kishidaning jüme künidin buyan ikkinchi qétim xitayning tokyoda turushluq bash elchisi ching yongni chaqiritip, xitayning mewjut haletni bir tereplime halda özgertishke tirishiwatqanliqini, yaponiye – xitay munasiwetlirining körinerlik derijide jiddyleshkenlikini bildürdi.

xitay diplomat ching yong uchrishishtin kéyin muxbirlarning soallirigha jawab bérip, yaponiye tashqi ishlar ministiri kishidagha ‹sherqiy xitay déngizidiki detalash qiliniwatqan arallarning xitay zéminining ayrilmas bir parchisi ikenlikini, ikki dölet arisidiki detalashning diplomatik yollar we söhbet usuli blen hel qilinishi kéreklikini› éytqanliqini bildürdi.

u yene, «uning (kishida) gha diyawyü arallirining xitay zéminining bölünmes bir parchisi ikenlikini, u sularda xitay paraxotlirining paaliyet élip bérishining tebiiy ehwal ikenlikini, ishlarning téximu chigishliship ketmesliki üchün ikki döletning diplomatik yollar arqiliq söhbet  ötküzüshke éhtiyaji barliqini éyttim» dédi.

asiyaning ikki chong iqtisadiy küchi arisidiki yirikchilik ötken bir qanche kün ichide yaponiye teripidin sinkako, xitay teripidin diyawyü, dep atiliwatqan detalashliq arallardiki xitay déngiz qirghiqi muhapizet etriti paraxotlirining köpiyip qélishigha egiship ulghayghanidi.