dunyadiki türkler atalmish yalghanchiliqlargha qarshi yürüsh teshkillidi
amérika paytexti washingtonda ermenlerning dewalirigha qarshi türkiyeni qollash meqsitide ötküzülgen «tinchliq we hemkarliq yürüshi» ge minglarche adem qatnashti.
türkiye awazi radiyosi xewiri: türk – amérikan milliy yüzlendürüsh komitéti washingtonda türkiyeni qollash yüzisidin «tinchliq we hemkarliq yürüshi» teshkillidi. yürüsh aqsaray aldidin bashlinip, türkiyening washingtondiki elchixanisi aldida axirlashti. yürüshke, türkiye büyük millet mejlisi (parlaménti) ning türk – amérikan dostluq guruppisining bashliqi elisarikaya, adalet we tereqqiyat partiyesining muawin bashliqi fatma betül sayan, adalet we tereqqiyat partiyesining parlamént ezasi ertan aydin, türkiyening washingtondiki bash elchisi serdar qilich we amérika musulmanliri kéngishining bash katipi usama jamal qatnashti.
bu qétimqi yürüshning yene bir meqsiti, atalmish 1915 – yil weqelirige munasiwetlik dewalargha, islam düshmenlikige we süriyelik musapirlargha diqqet qozghash bolup, yürüshke amérikida yashawatqan türklerdin bashqa yene, dost döletlerning puqraliri we musulman xelqlermu qatnashti. yürüshke qatnashqanlar, «tinchliq we hemkarliq üchün türkiyeni qollaymiz», «erméniyening térrorluq hujumlirida qurban bolghanlarni esleymiz» dégen shoarlar yézilghan lozunkilarni kötürüp, türkiyeni qollaydighan shoarlarni towlidi.
del bu waqitta, kanadada yashaydighan türklermu «ermenlerning yalghanchiliqliri» gha qarshi yürüdi.
kanadaliq türkler tinchliq we hemkarlishish munbiri teshkilligen 24 – aprél «tinchliq we hemkarlishish yürüshi», shéhit ofitsér atilla altikatning qebrisidin bashlandi. aldi bilen, 1982 - yili erméniye térrorluq teshkilati «asala» (ASALA) militanliri ottawada shéhit qilghan türkiyening kanada elchixanisining herbiy meslihetchisi ofitsér atilla altikat namigha qaturulghan qebrige gülchembirek qoyuldi. arqidin shéhitlerning rohigha atap dua oqulghandin kéyin, kishiler kanada fédératsiye parlamént binasining aldigha keldi. yürüshke qatnashqanlar bu yerde toplanghan ermenlerning namayishigha qarshi tekbir éytip, dölet marshi oqudi. andin türkiyening ottawadiki elchixanisigha qarap yürüshini dawamlashturdi.
yürüshke qatnashqan minglarche kishi yolboyi türkiye we kanada bayriqini lepilditip, ermenlerning yalghanchiliqirigha qarshi lozunkilarni kötürüp mangdi. yürüshke, ottawa, toronto, montréyal, xamilton, okwilli, missisawaga we bérlington qatarliq sheherlerde yashawatqan türkler hemde bashqa nurghunlighan döletlerning puqralirimu qatnashti.
