اومیگا تھری استعمال کیجیےدماغی بیماریوں سے بچیے

کیلیفورنیا میں مختلف اداروں کی مشترکہ تحقیق سے معلوم ہوا ہے کہ اومیگا تھری پروٹین انسانی دماغ میں خون کا بہاؤ بہتر کرتے ہوئے نہ صرف ہماری یادداشت بہتر بناتا ہے بلکہ بڑی عمر کے لوگوں میں الزائیمر سمیت کئی دماغی بیماریوں کی روک تھام بھی کرتا ہے۔

اس سلسلے میں 166 رضاکاروں سے متعلق طبّی معلومات جمع کی گئیں جب کہ ان کے غذائی معمولات کے علاوہ حساس آلات کی مدد سے ان کے دماغوں میں خون کے بہاؤ اور متعلقہ دماغی سرگرمیوں کا بھی تفصیلاً جائزہ   لیا  گیا۔ مطالعے کے بعد معلوم ہوا کہ جو افراد اومیگا تھری فیٹی ایسڈ والی غذائیں بطور معمول استعمال کرتے ہیں وہ یادداشت کے معاملے میں بھی دوسروں سے بہتر رہتے ہیں جب کہ  بڑھاپے میں بھی انہیں دوسرے لوگوں کی نسبت کم تر دماغی بیماریوں کا سامنا کرنا پڑتا ہے جن میں بطورِ خاص الزائیمر کی بیماری نمایاں ہے۔

الزائیمر کے علاوہ اومیگا تھری فیٹی ایسڈ کو مالیخولیا، ڈپریشن اور ڈیمنشیا کی روک تھام کے لئے بھی انتہائی مفید پایا گیا ہے۔

واضح رہے کہ مچھلی، مرغی اور انڈوں کے علاوہ السی کے بیجوں، خشک میوہ جات، بادام، پودینہ اور پالک میں بھی اومیگا تھری فیٹی ایسڈ وافر مقدار میں پایا جاتا ہے ۔