بھارت : تعمیراتی سائٹ پر مٹی کا تودہ گرگیا، 16 افراد ہلاک ،متعدد لا پتہ

بھارت کی شمال مشرقی ریاست منی پور میں مٹی کے تودے گرنے سے اب تک 16 افراد ہلاک جبکہ 70 سے زائد لاپتہ ہیں۔

بھارتی میڈیا کا کہنا ہے کہ حکام نے لاپتہ افراد کی ہلاکت کا خدشہ ظاہر کیا ہے۔

خبر کے مطابق ۔مٹی کے تودے گرنے کا یہ واقعہ ایک ایسے مقام پر پیش آیا ہے جہاں ریلوے لائنوں کی تعمیر جاری تھی۔

حکام کے مطابق متاثرہ مقام پر کم از کم 81 افراد موجود تھے۔

ریلوے کی تعمیراتی سائٹ پر مٹی کے تودے گرنے کے بعد، جہاں کارکنان صبح سویرے ایک عارضی کیمپ میں سو رہے تھے جبکہ امدادی حکام 19 افراد کو نکالنے میں کامیاب ہو گئے ہیں۔

اس ماہ غیر معمولی بارشوں نے بھارت کی شمال مشرقی ریاستوں اور ہمسایہ ملک بنگلہ دیش کو اپنی لپیٹ میں لے لیا جس میں 150 سے زائد افراد ہلاک ہو چکے ہیں۔

حالیہ ہفتوں میں آنے والے تباہ کن سیلاب سے لاکھوں لوگ بے گھر بھی ہوئے ہیں اور کچھ نشیبی علاقوں میں مکانات زیر آب آ گئے ہیں۔

فوج کے ہیلی کاپٹر جائے حادثہ کے مقام پر امدادی کارروائیوں میں مدد فراہم کر رہے ہیں۔