ÝB Gazagystandaky hadyslara alada bildirýär

ÝB-niň Daşary gatnaşyklar we Howpsuzlyk syýasaty boýunça Ýokary wekili Žozep Borrel, Gazagystanda başdan geçirilýän wakalar bilen bagly Ýewropa Bileleşiginiň adyndan beýanat berdi. 

Borrel, Gazagystandaky parahatçylykly demonstrasiýalardan soň başlan zorlukly aksiýalara alada bildirendiklerini, zorlukly aksiýalary ýazgarandyklaryny habar berdi. 

Hadysalaryň başga maksatlar üçin hyýanatçylykly peýdalanmaly däldigini aýdan we sowukganlylyga çagyran Borrel: "Krizisiň parahatçylykly çözgüdine goldaw bermäge taýardyrys. Daşary ýurtly esgerler Gazagystanyň özygtyýarlylygyna, garaşsyzlygyna we raýatlaryň adaty hukuklaryna hormat goýmalydyr" diýip mälim etdi. 

Gazagystanda 2-nji ýanwarda suwuklandyrylan gazyň bahasynyň ýokarlandyrylmagy we ýurtdaky durmuş-ykdysady ýagdaýyň ýaramazlaşandygy sebäpli protest aksiýalar başlapdy. 

Howpsuzlyk güýçleri bilen demonstrantlaryň arasynda çaknyşyklar başdan geçirilipdi. 

Esasan hem ýurdyň günortasyndaky Almaty şäherinde polisiýa gullugyna degişli ulaglary ýakan we döwlet binalaryna giren protestçilere howpsuzlyk güýçleri garşylyk görkezdi. 

Protestleriň ýaýbaňlanmagy sebäpli ýurdyň ähli ýerinde adatdan daşary ýagdaý yglan edildi. 

Gazagystanyň Prezidenti Kasym Jomart Tokaýew, Kollektiw howpsuzlyk ylalaşygy guramasyna agza ýurtlardan goldaw berilmegini sorady. 

Kollektiw howpsuzlyk ylalaşygy guramasyna agza ýurtlar bolan Russiýa, Belarussiýa, Gyrgyzystan, Täjigistan we Ermenistan tarapyndan ugradylan 2 müň 500 esger çaknyşyklaryň başdan geçirilen ýeri bolan Almaty şäherinde ýerleşdirildi. 

Tokaýew 7-nji ýanwarda ýurdyň ähli ýerinde konstitutsion düzgüniň ýaňadandan ýola goýulandygyny belläp: "Terrorçylar häzirki wagtda hem ýarag ulanmaga we raýatlaryň emläklerine zyýan ýetirmäge dowam edýär" diýip habar berdi. 

Gazagystanda howpsuzlyk güýçleriniň operasiýalary esasan hem Almaty şäherinde dowam edýär.