پاشینیان: آذربایجانلا باریش آنلاشماسی ایمضالایاجاغیمیزی اومود ائدیرهم
"اؤنوموزدهکی آیلاردا آذربایجانلا باریش و ایلیشکیلرین قورولماسی قونوسوندا بیر آنلاشما ایمضالایاجاغیمیزی اومود ائدیرهم. آذربایجان و ارمنیستان بیر بیرلرینین تورپاقلارینی تانیدیلار"
ارمنیستان باش باخانی نیکول پاشینیان، اؤنوموزدهکی آیلاردا آذربایجان ایله باریش آنلاشماسی ایمضالانماسینی و دیپلوماتیک ایلیشکیلر قورولماسینی اومود ائتدیگینی سؤیلهدی.
پاشینیان، گورجوستانین باشکندی تیفلیسده گئرچکلشدیریلن ۴.جو اولوسلارآراسی ایپک یولو فوروموندا، بؤلگهدهکی ارتباط خطلری و آذربایجان ایله باریش سورهجی حاقیندا آچیقلامالار وئردی.
ارمنیستانین، بؤلگهدهکی بوتون نقلیات و ارتباط خطلرینین آچیلماسییلا ماراقلاندیغینی ایفاده ائدن پاشینیان،
"اصل مسئله، نقلیات و ارتباط یوللارینین تیکیمینین اؤلکهلرین اگمنلیگی چرچیوهسینده و باریش اورتامیندا ائدیلمهسی. اؤنجه هر اؤلکه، اؤز دؤولت قوروملاری واسطهسی ایله گؤمروک و سرحدلردهکی نقلیاتین و اینسانلارین گوونلیگینی تامین ائتمهلیدیر. ارمنیستاندا بئله بیر قوروم یارادیلاجاق، جان و مال گوونلیگینین شرطلری یارادیلاجاق. بوتون اؤلکهلر قارشیلیقلیلیق و برابرلیک اصلی تملینده بیر بیرلرینین آلت یاپیلاریندان ایستیفاده ائدجک" ایفادهلرینی ایشلتدی.
آذربایجان ایله نورماللاشما و باریش سورهجینه ده توخونان نیکول پاشینیان، "اؤنوموزدهکی آیلاردا آذربایجانلا باریش و ایلیشکیلرین قورولماسی قونوسوندا بیر آنلاشما ایمضالایاجاغیمیزی اومود ائدیرهم. آذربایجان و ارمنیستان بیر بیرلرینین تورپاقلارینی تانیدیلار" دئیه دانیشدی.
ایرلیدهکی دؤنمده تورکیه ایله سرحدلرین آچیلماسینی دا دوشوندوکلرینی ایفاده ائدن پاشینیان، "دیپلوماتلارین سربست گئچیشینی تامین ائدجگیمیزی بئله اومود ائدیرهم" دئدی.