۱۹ میلیوندان چوخ اوشاغین حیاتی تهلوکه‌ده
۱۹ میلیوندان چوخ اوشاغین حیاتلارینین و گله‌جکلرینین ریسک آلتین‌دا اولدوغو بیلدیریلدی
بیرلشمیش میللتلر اوشاقلارا یاردیم صاندیغی (یونیسف)، بنگلادشده اقلیم دییشیکلیینه باغلی فلاکتلرین ۱۹ میلیوندان چوخ اوشاغین حیاتینی و گله‌جگینی تهلوکه‌یه آتدیغی اویاریسی وئردی.
یونیسف طرفین‌دن یاییملانان راپوردا، اقلیم دییشیکلیینه باغلی داغیدیجی سئل، سیکلون(شدتلی فیرتینا) و دیگر ائکولوژیک فلاکتلرین تأثیرلری ندنی ایله ۱۹ میلیوندان چوخ اوشاغین حیاتلارینین و گله‌جکلرینین ریسک آلتین‌دا اولدوغو بیلدیریلدی.
راپوردا، سؤزوگئدن رقملره، میانماردان قاچاراق بنگلادشین کاکس بازار بؤلگه‌سین‌ده‌کی دوشرگه‌لره سیغینان یوز مینلرجه آراکان‌لی مسلمان اوشاغین‌دا داخیل اولدوغو قید ائدیلدی.
بنگلادشده عائله‌لرین، اکینه یارارلی تورپاقلاردا دوزلولوغون آرتماسی، سو باسقینلاری و یا تورپاق سوروشمه‌سین سببی ایله دولانیشیق قایناقلارینی ایتیردیک‌دن سونرا کندلردن بؤیوک شهرلره کؤچ ائتدیگینه دقت چکیله‌ن راپوردا، چوخ ساییدا اوشاغین حیاتینی داوام ائتدیرمک اوچون کیچیک یاش‌دا ایشله‌مه‌یه، ائوله‌نمه‌یه و یا بعضا فاحیشه‌لییه مجبور ائدیلدیگی بیلدیریلدی.
یونیسف داکا سؤزچوسو ژان ژاک سیمون، آسوشیتد پر‌سه وئردیگی آچیقلامادا، تخمیناً ۱۲ میلیون اوشاغین، داشقین باش وئره‌ن چایلارین اطرافین‌دا، ۳ میلیون اوشاغین ایسه اکینچی توپلوملارین قوراق‌لیق‌دان اذیت چکدیگی یئرلرده یاشادیغینی ایفاده ائتدی.
راپورا گؤره، آرالارین‌دا باریناقلاردا یاشایان تخمیناً یاریم میلیون آراکان‌لی مسلمان اوشاغین دا اولدوغو دیگر ۴،۵ میلیوندان چوخ اوشاق ایسه گوج‌لو سیکلونلارین ووردوغو گئنیش ساحل بؤلگه‌لرین‌ده یاشاییر.
