برزیلده داشقین نتیجهسینده اؤلنلرین سایی 150-یه یوکسلیب
آچیقلامادا یارالانانلارین سایینین 807-یه یوکسلدیگی و سئلدن ضرر چکنلرین سایینین 2 میلیون 120 مینی، کؤچکونلرین سایینین ایسه 620 مینی کئچدییی بیلدیریلیب
برزیلده لئیسان یاغیشلارین سبب اولدوغو داشقینلاردا حیاتینی ایتیرنلرین سایی 150-یه یوکسلیب، 112 نفر ایسه هله ده ایتکین دوشوب.
اؤلکهنین گونئییندهکی ریو گرانده-دو-سول ایالتینده ایکی هفتهدیر داوام ائدن یاغیشلارین سبب اولدوغو داشقینلار سببیندن جان و مال ایتکیلری آرتیر.
ایالتین مولکی مودافیعهسی طرفیندن وئریلن آچیقلامادا اؤلنلرین سایینین 150، ایتکین سایینین ایسه 112 اولاراق یئنیلندیگی بیلدیریلیب.
آچیقلامادا یارالانانلارین سایینین 807-یه یوکسلدیگی و سئلدن ضرر چکنلرین سایینین 2 میلیون 120 مینی، کؤچکونلرین سایینین ایسه 620 مینی کئچدییی بیلدیریلیب. آچیقلامادا، فلاکت بؤلگهسیندن 80 مین اینسانین خیلاص ائدیلدیگی، آختاریش-خیلاص ائتمه ایشلرینین داوام ائتدیگی بیلدیریلیب.
ریو گرانده دو سول والیسی ادواردو لئیته می آیینین 3-ده وئردیگی آچیقلامادا "بو، ایالت تاریخیندهکی ان داغیدیجی حادیثهدیر" دئدی و فاجیعهنین بؤیوکلویونه گؤره 180 گون بویونجا "فلاکت وضعیتی" اعلان ائتدیکلرینی سؤیلهدی.
بو آرادا پرزیدنت لوئیز ایناسیو لولا دا سیلوا اوچونجو دفعه فلاکت بؤلگهسینه سفر ائدرکن تمثیلجیلر مجلیسینده کئچیریلن رای وئرمهده ریو گرانده دو سول ایالتینین خزینهدارلیغا اولان بورجونون 3 ایل مودتینه تاخیره سالینماسی قراری رای بیرلیگی ایله قبول ائدیلیب.
ایلگیلیلی خبرلر
مکزیکده قوش قریپیندن ایلک اؤلوم
مکزیکده قوش قریبینین آلت نوعو اولان A(H5N2) ویروسوندان ایلک اؤلوم اولدوغو تصدیقلَنیب