آلبانیالی شاعر ژتن کلمندینین شعرلری
تنقیدچیلرین فیکرینجه، ژتن کلمندی معاصر آلبانیا شعرینین اصل نماینده‌سی‌دیر
ژتن کلمندی آلبانیالی شاعر‌دیر. او، یازی‌چی، دراماتورق، پوبلیسیست، ترجومه‌چی و اونیوئرسیته پروفسورو کیمی فعالیت گؤستریر.
۱۹۷۸.جی ایلده کوزوونون پجا (ایپک) شهرین‌ده آنادان اولوب، ایلک تحصیلینی ده پجادا آلیب. داها سونرا پریشتینا اونیوئرسیته‌سینده تحصیلینی داوام ائتدیریب، اینجه‌صنعت اختصاصی اوزره لیسانس درجه‌سینی بیتیریب.
اونون اثرلری باشقا دیللره ان چوخ ترجومه ائدیله‌ن آلبانیالی شاعر‌دیر. تنقیدچیلرین فیکرینجه، ژتن کلمندی معاصر آلبانیا شعرینین اصل نماینده‌سی‌دیر. اولوسلارآراسی سویه‌ده تنقیدچیلر و شاعرلر اونون یارادیجیلیغی حاقیندا چوخ‌سایلی مقاله‌لر یازیب، اونو بؤیوک بیر آوروپا شاعری حساب ائتدیکلرینی وورغولاییبلار.
سنه بیر سؤزو دئیه‌جه‌م
غریبه فیکیرلر چیخار
آغزیمدان،
روحومدان،
فرقلی بیر دونیادان.
گاه‌دان گئدرکه‌ن،
گاه‌دان گلرکه‌ن حس ائدیرلر...
بیلیرم،
اونلاردان بیر نئچه‌سینین...
دانیشیلمایان،
و یازیلمایان دیلی وار.
اما دئییرم کی، او بیر یئرده...
سن و من آراسین‌دا بیر یئرده...
حیاتیم،
آخ... چوخ تئز کئچدی گئتدی.
بوتون دیللرین اؤز الیفبالاری اولدوغو زامان
یئنی باشلانغیجلارین‌دا
بیزیم دیلیمیزدن دوغولور زامان...
و زامانسیز بیر آدادیر زامان
زامانی اولمایانلارا زامان وئریر
روحون-ذهنین
سرحد قاپیسیندا
بیر سیرا سؤزسوز حرفلر طرفین‌دن یوخلانیلیر.
باشقا شئیلرده اولدوغو کیمی
اؤزومدن گیزلنیرم.
قولاقلاریم گؤرمور منی
گؤزلریم ائشیتمیر منی...
دانیشیلمایان،
زامانسیز دیللری بیلمک داها خوشدور
معناسیز معنالارین باشیندا،
دانیشدیقلاریمیز مثالی...
غریبلیگیمدن سونرا
هئچ بیر شئیه بویون ایمیرم،
بوراخ،
بو اویونون قورانلارینی!
نتیجه‌نین سونونو کیم بیلیرسه بیلسین،
بیری قازاناجاق،
بیری مغلوب اولاجاق...
سئودییم یئرده‌یه‌م
بیر یئرده‌یه‌م،
صبرین دانیشیلمایان جمله‌سینده
خاطره‌دن یوکسک بیر نقطه‌ده،
بیر شکیل چرچیوه‌سینده یاشاییرام.
اؤز-اؤزومون سونوندا، آشاغیدا
بیر یئرده یاشاییرام.
معنا منی آنلاییرسا
خوشبخت اولورام.
یورغون حوزنومده
تاپیرام اؤزومو،
بورا کیمی هئچ بیر رؤیادا
گؤرولمه‌میش کیمی،
زامانین الیمدن سوروشوب گئتدیگینی
گؤروره‌م...
و یوخلوغومون وار اولمادیغینا راضیلاشدیم...
اؤزومو تاپماق اوچون
هر یئره گؤز گزدیریرم...
بیلیرم، بوتون ایپ‌اوجلاری سنه چاتیر
و هئچ بیر سوالیم یوخدور،
آدینی خاطیرلاییرام...
و بو یئترلیدیر!
سئوگینین کؤکو
حیاتین آنلامی
گله‌جه‌یه دوغرو آددیملاماغیمیزدیر،
گؤرمه‌یه هر کسین حاقی اولان
بیر رؤیا...
ائله بیر وارلیق کی،
سئوگینین هاردان گلدیگینی
و هارا گئده‌جگینی بیلمه‌سه ده،
هر کس اونو اؤزونه،
یاخینلارینا ایستر...
سن اونون کؤکونو بیله بیلمزسه‌ن،
بو بیر سیردیر،
زامانین بیزیمله
بورایا قدر گتیردیگی بیر سیر...
هاوا کیمی گیزلین.
عالیملر عشقین منشائی حاقیندا
دانیشیقلاریندا،
آچیقلامالار و شعرلر یازدیلار،
اما دقیق اولان بیر شئی وار،
عشق هر گون دوغولار
هر گئجه،
گئجه یاریسیندان سونرا...
هر یئرده اورتایا چیخار.
سئوگی هاردا یاشایارسا،
حیات هارداجا عاشق اولور،
هاردا اونون
کؤکو، مکانی، زامانی...!
ایلین یئنی صحیفه‌سی
بیر فصلین دیگرینی ایزله‌مه‌سی کیمی.
کؤک معنادیر...
هم آچیق-آشکار
هم ده گیزلی.
عشق تانری‌دان گلر،
منشائنی
ساده‌جه او بیلر...
زاماندا قال!
اورداسان اگر
طالع سنه دوغرو گلیر، قاپینی دؤیه‌جک،
اؤزونله باغلی نه سوروشسان، سوروش...
بیر فورصتین قاچا بیله‌جگی قدر سنه باخار.
ایتمیشدیرسه، بیل کی، سن منیم ایچیمده ایتمیسه‌ن،
آرتیق ایسته‌دیگینی آنلامایاجاقسان.
طالعه دوغرو سوروکله‌یه‌ن
بئله بیر سفرلره چیخ!
نه سن دونیانی ساییرسان،
نه ده سن دونیانین اؤنملی‌سی دئییل‌سه‌ن.
بورداسان اگر
زامان گلیر، پنجره‌نی دؤیور
اؤزوندن قالخ،
بیر آز زامانی اله کئچیر،
و زاماندا قال...
حرکتسیز اویون
زامانی گله‌جک
اؤزونو ذیروه‌یه داشیماق اوچون
حاضر اولدوغوندا
قاپی آچیلاجاق،
گئجه گؤزله‌یه‌جک
کیم کیمی قارشیلایاجاق -
سن، یوخسا من؟
و حاضیرلاش... یولا چیخ...
صبر ائتمه‌یی سئوه‌جکسه‌ن زامانیندا
اؤزونو تسلیم ائتمکدن قورخان بیریسینه
زامان وئر، سئوگی وئر، اؤزونو وئر...
اویونون بوتون قاعده‌لری،
سنین حرکتلرین‌دن آسیلی قالیر...
گؤزلنیلمز حادثه‌لری خاطیرلا
سسسیزلیگی شکیللرله
و معصوملوغون صورتینی قالدیر...
گئرچگی سؤیله
و اوتاغیندا فرحله اوتوروب منی گؤزله
گلیرم،
بیر اویون اویناماغا،
عشق اویونو...
ترجومه ائتدی: اومید نجاری
