گوندم آنالیز:44
دؤردلو ذیروه ییغینجاغیندان سونرا سوریه
ایستانبول-دا فرانسا، آلمانیا، روسیا و تورکیه-نین ایشتیراکی ایله کئچیریلن دؤرد طرف‌لی ذیروه ییغینجاغیندا سوریه-ده باریشی تامین ائتمک اوچون آنایاسا کومیته‌سی‌نین قورولماسی کیمی اهمیت کسب ائدن قرارلار قبول ائدیلدی. قبول ائدیلن همین قرارلار آتیلمیش بیر آددیم کیمی اهمیت‌لی اولسا دا، سوریه داها اؤنملی پروبلئم‌لرله قارشی-قارشییا‌دیر. بو چرچیوه‌ده سوریه-عراق سرحدینده داعش و ی.پ.گ ترور تشکیلات‌لاری آراسیندا داوام ائدن توققوشما‌لار، سوریه-تورکیه سرحد خطینده ی.پ.گ طرفیندن ناراحات‌لیق دوغورماسی مقصدیله ائدیلن آتیش‌لر و تورکیه سلاح‌لی قوه‌لری‌نین بومبالادیغی ی.پ.گ موضع لری و ادلیب بؤلگه‌سیندکی قروپ‌لار آراسیندا باش وئرن توققوشما‌لار سوریه-ده باریشین تامینی اوچون هله آتیلما‌لی واجیب آددیم‌لارین اولدوغونو گؤستریر.
ایستانبول-دا گؤروش کئچیرن 4 اؤلکه لیدرلری سوریه-ده باریشین تامینی اوچون اهمیت‌لی قرارلارا یئتیشدی‌لر. خصوصیله اوزون مودت‌دیر قورولماسی اوچون جهد گؤستریلن آنایاسا کومیته‌سی‌نین یارانماسی اوچون قبول ائدیلن قرار سوریه-نین گلجیینه اؤنملی نیسبتده اؤز تأثیرین گؤستره‌جک یئنی آنایاسا حاضیرلانماسی سوریه-ده باریشین تامینی اوچون اهمیت‌لی اولسا دا، مطلق حل یولو اولمادیغی دا معلوم‌دور. آنایاسا یازیلدیقدان سونرا بونون سوریه خالقی طرفیندن سسه قویولما پروسه‌سی ایسه موختلیف چتین مانعه‌لر احاته ائدیر. میلیون‌لارلا سوریه-لی‌نین اؤلکه‌دن کناردا اولدوغو، میلیون‌لارلا سوریه-لی‌نین اؤلکه داخیلینده کؤچ ائتمک مجبوریتینده قالدیغی و سوریه-لی لرین اسد رژیمی‌نین موضعینه گؤره پاسپورت کیمی اؤنملی سندلری الده ائتمه‌لرینه مانع اولوندوغو شرط‌لرده سئچکی‌نین کئچیریلمه‌سی خیلی چتین ایشدیر. ادلیب اوچون تامین ائدیلن آتشکس قراری‌نین، ترور تشکیلات‌لاری ایله و بولوجو ترور تشکیلات‌لاری ایله موباریزه‌نین داوام ائتدیریلمه‌سی‌نین قرارا آلینماسی بؤیوک اهمیت داشیییر. نتیجه‌ده ترور تشکیلاتی ی.پ.گ کیمی سوریه-نین تورپاق بوتؤو‌لوگونو تهدید ائدن قروپلاشما‌لارین نیت‌لرینه مانع اولماق آدین‌دان تورکیه-نین جهدلری دیپلوماتیا ساحه‌سینده ده اوغورلو اولور.
سوریه ساحه‌سیندکی وضعیته گلدیکده ایسه، سوریه-عراق سرحدینده ی.پ.گ ایله داعش ترور تشکیلات‌لاری آراسیندا داوام ائدن توققوشما‌لاردا یئنی وضعیت یاشاندی. ترور تشکیلاتی ی.پ.گ-نین امریکا، فرانسا و ایتالیانین خصوصی قوه لرینین دستکی ایله داعش-ین نظارت ائتدیگی هاجین جئبینه عملیات باشلامیشدی. بؤلگه‌ده باش وئرن قوم فیرتیناسیندان ایستیفاده ائدن داعش ترور تشکیلاتی ی.پ.گ-نین نظارتی اله کئچیرمک اوچون آیلارلا جهد گؤستردیگی بؤلگه‌لری بیر نئچه گون عرضینده اله کئچیردی. بؤیله‌جه داعش سلاح‌لی‌لاری یئنی‌دن عراق-ین سرحدینه گلیب چاتدی‌لار. عراق طرفیندن ایسه مومکون اولان داعش هوجوم‌لارینا قارشی تدبیرلر گؤرولدو و حشدی الشعبی قوه‌لری بؤلگه‌یه ایستیقامتلندیریلدی. داعش-ین بؤلگه‌ده ایره‌لیلمه‌سی ایله یاناشی بؤلگه‌یه علاوه قوه گؤندرن ی.پ.گ سلاح‌لی‌لاری داعش-ین قارشی‌سینی اولوسلار آراسی دستکینه باخمایا‌راق آلا بیلمه‌میش‌دیر. داعشه قارشی موباریزنی بهانه گتیره‌رک اؤزونه قانونی زمین تامین ائدن ی.پ.گ تشکیلاتی‌نین داعشی تامامیله محو ائتمه نقطه‌سینده نه قدر ایستک‌لی اولدوغو دا اؤنملی بیر سوال کیمی قالیر.
ترور تشکیلاتی ی.پ.گ-نین سوریه-نین گونئی دوغوسوندا داعشه قارشی اؤنملی ایتکی‌لری اولماسیندان سونرا، سوریه-نین قوزیی ینده تورکیه ایله اولان سرحد منطقه‌سینده کیچیک میقیاس‌لی دا اولسا توققوشما‌لار و تورکیه سلاح‌لی قوه‌لری‌نین بومباردمانی یاشاندی. عین العرب-ین باتی سینداکی سرحد منطقه‌سینه حاکم تپه‌لری تورکیه-یه تهدید اولا بیله‌جک ی.پ.گ موضع لری تورک توپچولاری طرفیندن محو ائدیلدی. سونرا ایسه تل ابیض سرحد منطقه‌سینده تورک عسگری ایله ی.پ.گ تروریستلری آراسیندا توققوشما یاراندی. ارته‌سی گون یئنی‌دن عین العرب-ین باتی سیندا یئرلشن ی.پ.گ موضع لریندن تورکیه سرحدلری داخیلیندکی زیره‌لی تکنیکایا قارشی آنتی-تانک‌دان ایستیفاده ائدیلدی. ی.پ.گ-نین سایت‌لارین‌داکی پایلاشما‌لاردا هوجومون گؤرونتولری یاییلدی. باش وئرن بو حادثه‌دن سونرا ی.پ.گ-نین هاجین جئبینده داعشه قارشی عملیاتینی تورکیه-نین بومباردمانینا گؤره دایاندیردیغینی آچیقلاماسی ی.پ.گ-نین داعش-دن اؤزونون مقصدلری ایستیقامتینده نئجه واسیطه‌‌چی کیمی ایستیفاده ائتدیگینی ثبوتا یئتیریر.
دیگر مسئله‌سی ایسه ادلیب بؤلگه‌سینده باش وئرن توققوشما‌لاردیر. سوچی پروتوکولو ایله ادلیبه قارشی احتیمال اولونان بیر هوجومون قارشی‌سی آلیندی. کئچن گون‌لرده ایسه ادلیب بؤلگه‌سینده هیئت تحریر الشام ترور تشکیلاتی ایله نورالدین زنگی حرکاتی آراسیندا توققوشما‌لار یاراندی. سوریه-لی موخالیفتین هیئت تحریر الشام-ا قارشی توققوشما‌لاری اوزون مودت داوام ائتمه‌سه ده بؤلگه‌دکی دینامیک لرین هانسی سویه‌ده مرکب اولدوغونو ثبوتا یئتیریر. سوریه-ده باریشی تامین ائتمک اوچون ادلیب-ده داواملی باریشین تامین ائدیلمه‌سی خیلی اهمیت داشییا‌جاق‌دیر.
تورکیه‌نین گوندمینه دایر تحلیل پروقرامی‌نین نوبتی بؤلومونده سیاست، ایقتیصادیات و جمعیت آراشدیرما‌لاری فوندونون امکداشی جان آجونون " دؤردلو ذیروه ییغینجاغیندان سونرا سوریه " باش‌لیق‌لی آنالیتیک یازی‌سینی تقدیم ائتدیک.
