گوندم آنالیز: 31
ترامپ و پوتینین هلسینکی گؤروشو
امریکا پرزیدنتی دونالد ترامپ و روسیا پرزیدنتی ولادیمیر پوتینین هلسینکی-ده کئچیردیگی ییغینجاق موختلیف جهتلردن اهمیت داشیییر. ایکی اؤلکه آراسینداکی علاقهلر سون دؤورده خیلی گرگین ایدی. پوتین و ترامپین کئچیردیگی گؤروشون اساس گوندم موضوع لاری نوکلئر سیلاحلانما، روسیانین امریکادا کئچیریلن سئچکیلره موداخیلهسی، انرژی سیاستی، سوریه و چین اولدو.
تاریخی اولاراق سووئت بیرلیگی و امریکا آراسینداکی گرگینلیگین درینلشدیگی دؤورلرده ایکی اؤلکهنین موذاکیره آپارماسی اوچون فینلاندیا بی طرف بؤلگه کیمی سئچیم ائدیلیردی. ترامپ و پوتین بو عنعنهیه عمل ائدهرک گؤروشو فینلاندیادا کئچیردی. فینلاندیانین ائو صاحیبلیگینده باش توتان گؤروش سادهجه ایکی اؤلکه علاقهلری باخیمیندان دئییل، دونیا اوچون ده بؤیوک اهمیت داشیییردی.
مطبوعات طرفیندن ماراقلا تعقیب ائدیلن گؤروشلردن سونرا ایکی اؤلکه لیدری بیرگه مطبوعات کنفرانسی تشکیل ائتدی.
ترامپین مطبوعاتا آچیقلاما وئردیگی زامانکی رفتاری و بیاناتلاری امریکا مطبوعاتی و قاباقجیل امریکا سیاسی خادیملرینین جدی تنقیدلرینه معروض قالدی. امریکا پرزیدنتی دونالد ترامپا روسیانین امریکانین سئچکیلرینه موداخیلهسیله علاقهلی سواللار قارشیسیندا؛ ترامپین روسیا پرزیدنتی پوتینین یانیندا امریکا ایدارهلرینی تنقید ائدیب، روسیانین ایفادهلرینه داها چوخ اعتیماد ائتدیگی بارهدکی سؤزلری جدی رئاکسیایا سبب اولدو. ترامپ داها سونرا هلسینکی-ده کئچیریلن توپلانتیدا سهو ایفاده ایشلتدیگینی و بئلهلیکله ضد معنالی بیر آچیقلاما وئردیگینی سؤیلهیهرک هلسینکیدکی آچیقلاماسینی یئنیلهدی.
نه قدر ده امریکا ایجتیماعیتینین رئاکسیاسی ترامپ و پوتینین گؤروشونه کؤلکه سالسا دا، ایکی اؤلکه اولوسلار آراسی ژئوسیاسی موضوع لارلا علاقهلی اؤنملی موذاکیرهلر آپاردیلار. ان اؤنملی موضوعنون ایکی اؤلکهنین چینه دایر کئچیردیگی موذاکیرهلر اولدوغو دئییله بیلر. امریکانین چین ماللارینا قارشی مالیه ساحهسیندکی محاربه خصوصیتینده جزا وئرگی لری تطبیق ائتمه قراری، امریکا و چین آراسیندا اؤنملی گرگینلیگه گتیریب چیخارمیشدی. هلسینکی-ده کئچیریلن گؤروشده امریکا و روسیا آراسیندا چینه قارشی طرفداشلیق اوچون بیر اؤن یوخلاما آپاریلدی. لاکین روسیا و امریکانین چینه قارشی بیر اتفاق قورماقدان خیلی اوزاق اولدوقلاری و بئله بیر اتفاقین اوفوقده گؤرونمدیگی ده سؤیلنه بیلر.
هلسینکی-ده دیگر اؤنملی بیر موضوع ایسه سوریه اولدو. امریکا و روسیا سوریه-نین جنوبونداکی وضعیتی ده موذاکیره ائتدی و ایسراییل-ین تهلوکهسیزلیگی و ایرانین بو بؤلگهدکی موجودلوغوندان دانیشدی. پوتین ایسراییل و سوریه رژیمی آراسیندا 1974-جو ایلده قبول ائدیلن موقاویله اساسیندا راضیلیق الده ائدیله بیلمهسینین مومکونلوگونو دیله گتیردی. ترامپ ایسه اؤلکهسینین ایرانین سوریه-ده کی موجودلوغونو قبول ائتمهیهجگینی وورغولادی. اما ترامپ ایرانا قارشی سوریه-ده نئجه بیر آددیم آتاجاغینا دایر ایشاره وئرمهدی.
ایکی اؤلکه آراسیندا کئچیریلن ییغینجاق ناتو ذیروهسیندن سونرا کئچیریلدی. ناتو ییغینجاغیندا آلمانیانی روسیایا "شیمال آخینی-2" گاز کمرینه گؤره انرژی سیاستلری جهتدن آسیلی اولماقدا تنقید ائدن امریکا باشقانی ترامپ هلسینکی-ده مطبوعاتا آچیقلاماسیندا بو قرارین آلمانیایا عایید اولدوغونو ایفاده ائتدی. پوتین ایسه ایجتیماعیت قارشیسیندا امریکایا اولوسلار آراسی بازارداکی گاز قیمتلرینی اورتاق معین ائتمک اوچون تکلیفینی بیر داها دیله گتیردی. نتیجهده روسیا ایقتیصادیاتی گاز صادراتیندان آسیلی اولدوغوندان اولوسلار آراسی بازارداکی انرژی قیمتلری بیرباشا روسیا ایقتیصادیاتینا اؤز تأثیرینی گؤستریر.
هلسینکی-ده کئچیریلن ییغینجاغین دیگر اؤنملی موضوعسو ایسه نوکلئر سلاح مسئلهسی اولدو. امریکا و روسیا دونیادا مؤجود اولان بوتون نوکلئر سیلاحلارین 90 فایزینه صاحبدیر. ایکی اؤلکه لیدرینین گؤروشلرینده دونیاداکی نوکلئر سیلاح میقدارینی آزالتماق اوچون امریکا و روسیا آراسیندا ایمضالانان موقاویلهنین داوام ائتدیریلمهسینه قرار وئریلدی.
هلسینکی گؤروشو روسیا و امریکا آراسیندا گرگینلیگه سبب اولان موضوعلاری جدی معنادا حل ائده بیلمهسه ده، ایکی اؤلکهنین لیدرلرینین طرفسیز بؤلگهده گؤروش کئچیرمهسی و موختلیف موضوع لاردا فیکیر موبادیلهسی آپارماسی ایکی اؤلکه علاقهلرینین بیر قدر ده اولسا نورماللاشماسینا گتیریب چیخاردی.
سیاست، ایقتیصادیات و جمعیت آراشدیرمالاری فوندو-ستا-نین آراشدیرماچی-یازاری جان آجونون "ترامپ و پوتینین هلسینکی گؤروشو" موضوعسو ایله باغلی دیرلندیرمهسینی تقدیم ائدیریک.