گوندم آنالیز: 30
نئوفاشیست ترور قروپو NSU -نون محکمه پروسئسی و آرتان عرقچیلیک-ایسلامافوبیا
آلمانیادا 8-ی تورک اولماقلا 10 آدامی اؤلدورمک، بانک‌لاردان پول اوغورلاماق و بومبا‌لی هوجوم‌لار تؤرتمکله اتهام اولونان نئوفاشیست ترور قروپو NSU -نون محکمه‌سی سونا چاتدی. اما محکمه ایله باغلی شوبهه و غیری-معین‌لیک‌لر داوام ائدیر. بو ترور تشکیلاتیندان درس گؤتورجگینی دئین آلمانیا حکومتی و توپلوموندا ایسه گئت-گئده عرقچیلیک و ایسلامافوبیا آرتماقدا‌دیر.
مونیخ عالی ایالت محکمه‌سینده 5 ایلدن آرتیق‌دیر داوام ائدن محکمه‌ده اساس جینایتکار "بئاته چه‌په" ایله یاناشی یاردیمجی 4 متهم محاکیمه ائدیلدی.
ساووجیلق و آلمانیا تهلوکه‌سیزلیک قوه‌لری NSU ترور تشکیلاتی‌نین 3 نفردن عبارت اولدوغونو سؤیلییر.
"بئاته چه‌په" ایله یاناشی دیگر NSU عضو‌لرین‌دن Uwe Böhnhard و Uwe Mundlos 2011-جی ایلین 4 نوامبریندا بانک‌دان پول اوغورلاییب گیزلندیک‌لری کاراوان ماشیندا اؤلو تاپیلدی‌لار. "انتحار ائتدیک‌لری" فیکری‌نین ایره‌لی سورولمه‌سی موختلیف شوبهه‌لر دوغوردو. همچنین NSU محکمه‌سی‌نین اساس متهمی "بئاته چه یه "نین تشکیلات عضو‌لری‌نین سون ایستیفاده ائتدیک‌لری حوجره ائوه اود ووروب یاندیردیق‌دان بیر نئچه گون سونرا پولیسه تسلیم اولماسی تشکیلاتین گیزلی طرف‌لرینی اؤرتودوگو شوبهه‌لرینی آرتیردی. آلمانیانین ایچ کشفیات ایداره‌سی – آنایاسینی قوروما تشکیلاتی‌نین NSU ایله علاقه‌دار 130 دوسیانی (پرونده) یوخ ائتمه‌سی ایسه تشکیلات حاقین‌داکی حقیقتین هئچ واخت اورتایا چیخمایاجاغینی گؤستریر. نتیجه‌ده محکمه پروسئسینده کی وکیل‌لر NSU ترور تشکیلاتی‌نین جمعی 3 نفردن عبارت اولوندوغونا اینانمیرلار.
تشکیلاتین محکمه پروسئسی‌نین باشا چاتماسینا باخمایا‌راق، تهلوکه‌سیزلیک قوه‌لری‌نین، خصوصیله، آنایاسانی قوروما تشکیلاتی‌نین اصلینده NSU باره‌ده نیی بیلدیگی کیمی حساس بیر سوا‌لی‌نین جاوابی غیری-معین قالدی.
آلمانیا تهلوکه‌سیزلیک قوه‌لری NSU ترور تشکیلاتی طرفیندن تؤره‌دیلن جینایت لرین آرخاسیندا ایلک نوبه‌ده قوربانین عائله‌سین‌دن شوبهه‌لنیر و عرقچیلیک احتیمالینی قبول ائتمیر. اؤلکه مئدیاسی ایسه بونون عکسینی یازیردی. آلمانیا تهلوکه‌سیزلیک قوه‌لری‌نین فیکیرلری یاییندیرماسی و جینایت لرین آرخاسیندا عرقچی ترور تشکیلاتی‌نین اولما احتیمالینی قبول ائتمه‌مه‌سی NSU-نون قتل حادثه‌لرینی داوام ائتدیرمه‌سینه و 10 نفرین اؤلومونه سبب اولدو.
بلی، بو ترور تشکیلاتی‌نین محکمه پروسئسی باشا چاتدی، اما عینی زاماندا آلمانیا‌داکی عرقچیلیک و ایسلامافوبیا آرتیمی موشاهیده ائدیلمکده‌دیر. بونون اساس گؤستریجی‌سی اودور کی، ایفرات ساغچی پارتی AfD ایجتیماعی رای سورغولارینا گؤره آلمانیا سیاستینده ان چوخ دستک‌لنن ایکینجی بؤیوک پارتی ایستاتوسونو قازاندی. AfD-نین ایکینجی ان بؤیوک پارتی اولماسی ایله عیرقچی‌لیک و ایسلامافوبیا آلمانیا سیاستی و توپلوموندا یئرلشدی دئییله بیلر. اؤلکه‌ده موجود اولان خاریجی وطنداش‌لارا قارشی دوشمن‌لیک و ایسلامافوبیا آرتیق AfD ایله اؤزونو بوروزه وئریب.
آلمانیا توپلومونون دییشدیگینی گؤسترن دیگر اؤنملی فاکت ایسه آلمانیا میللی فوتبول تیمی دیر. 2014-جو ایلده دونیا شامپیونو اولان تیم اوزون ایللردیر اینتقراسیون و چوخ مدنیت‌لی حیاتین اوغورو کیمی قلمه وئریلیردی. مسعود اؤزیل، ایلکای گوندوغان، سامی کئدیرا، لوکاس پودولسکی، ژرومه بواتنگ کیمی موهاجیر ایدمانچی‌لار آلمانیا میللی تیمی‌نین عضو‌لری ایدی. لاکین تیم عیرقچی‌لیگینی گؤستردی. ایلک جدی قالماقال AfD پارتیسی‌نین صدری الکساندر گولندین "میللت ژرومه بواتنگی قونشو کیمی ایستمیر" آچیقلاماسی ایله باش وئردی. ایکینجی جدی قالماقال ایسه مسعود اؤزیل و ایلکای گوندوغانین تورکیه پرزیدنتی رجب طیب اردوغانلا اینگیلتره‌ده شکیل چکدیرمه‌لریله یاراندی: آلمانیا میللی تیمی‌نین روسیادا کئچیریلن دونیا کوپاسی قروپ‌لاریندا غلبه قازانماماسی‌نین سببی اولا‌راق بو شکلین آدینی چکدی.
تورکیه‌نین گوندمینه دایر تحلیل پروقرامی‌نین نوبتی بؤلومونده سیاست، ایقتیصادیات و جمعیت آراشدیرما‌لاری فوندونون امکداشی جان آجونون "نئوفاشیست ترور قروپو NSU -نون محکمه پروسئسی و آرتان عرقچیلیک-ایسلامافوبیا " باش‌لیق‌لی آنالیتیک یازی‌سینی تقدیم ائتدیک.
