گوندم آنالیز: 23
تورکیه ایله امریکا آراسیندا منبیچه دایر راضیلاشما
تورکیه و امریکا آراسیندا سون ایللرده موختلیف موضوع لارلا علاقهلی گرگینلیک یاشانیر. خصوصیله امریکانین فتو ترور تشکیلاتینین چئوریلیش جهدیندن سونرا پنسیلوانیادا اولان قولدورباشی فتح الله گولنی تحویل وئرمهمهسی و پ.کا.کا-نین سوریه-ده کی قولو اولان ی.پ.گ-نی آچیق شکیلده دستکلهییب متفیق اعلان ائتمهسی ایکی اؤلکه آراسینداکی علاقهلره ضرر یئتیریر. تورکیهنین ترورلا موباریزهدکی یئنی دوکترینی چرچیوهسینده حیاتا کئچیردیگی "فرات قالخانی" عملیاتی و "زیتون دالی" عملیاتیندان علاوه آستانا پروسئسی چرچیوهسینده تورکیه سلاحلی قوهلرینین ادلیب بؤلگهسینده قوردوغو 12 موشاهیده منطقهسی تورکیهنین بؤلگهدکی تأثیر گوجونو آرتیردی. تورکیهنین "زیتون دالی" عملیاتی ایله ی.پ.گ ترور تشکیلاتینین ان اؤنملی دوشرگهلریندن بیرینی تروردان آزاد ائتمهسی تورکیهنین الینی منبیچ مسئله سینده گوجلندیردی.
منبیچ سوریه اینقیلابینین ایلک ایللرینده آزاد سوریه اردوسو طرفیندن اله کئچیریلدی، 2014-جو ایلده داعش-ین ایشغالینا معروض قالدی. 2016-جی ایلده ایسه امریکانین رهبرلیگیندکی اولوسلار آراسی کوالیسیون ی.پ.گ-نین اساسینی تشکیل ائتدیگی سوریه دموکراتیک قوهلریله منبیچ بؤلگهسینه ایستیقامتلی عملیات باشلاتدی. تورکیهنین اعتراضلاری و خبردارلیغی قارشیسیندا امریکا تورکیهیه داعش-ین بؤلگهدن چیخاریلماسیندان سونرا ی.پ.گ سلاحلیلارینین یئنیدن فراتین شرقینه چکیلهجگی و بؤلگهنین یئرلی عرب عنصورلارینین نظارتینه بوراخیلاجاغینا دایر وعد وئرمیشدی. امریکالی رسمیلرین ی.پ.گ-نین منبیچدن چکیلدیگینه دایر آچیقلامالارینا باخمایاراق، ی.پ.گ بؤلگهنی ترک ائتمهمیشدیر. همچنین امریکانین منبیچ بؤلگهسی اوچون قوردوغو منبیچ حربی شوراسی ی.پ.گ-نین پرده آرخاسی تشکیلاتی کیمی فعالیت گؤستریر. منبیچ حربی شوراسی رسمی اولاراق موستقیلدیر، آنجاق پ.کا.کا-نین منبیچ بؤلگهسینه بیرباشا تعیین ائتدیگی جمیل مظلوم و ایسماییل دریک منبیچ حربی شوراسینی ایستیقامتلندیریر. بوندان علاوه بؤلگهدن خبر یایان بیر چوخ ژورنالیست پ.کا.کا/ی.پ.گ-نین بؤلگهدکی مکتبلرده اؤز ایدئولوژی سینین تبلیغاتینی آپاردیغینی بیلدیریر.
منبیچ بؤلگهسی اوچون تورکیهنین الینی گوجلندیرن اؤنملی فاکت یئرلی اهالینین ی.پ.گ ایدارهسیندن ناراحات اولماسیدیر. نتیجهده منبیچ بؤلگهسیندکی ی.پ.گ ظلموندن قاچان مینلرله اینسان "فرات قالخانی" عملیاتی ایله آزاد ائدیلن بؤلگهلره سیغینیب. همچنین منبیچ بؤلگهسیندکی طایفهلار و یئرلی اهالی ی.پ.گ-نین گنجلرین الینه تضییقله سلاح وئرمهسی و ایشکنجه ائتمهسی قارشیسیندا سایسیز اعتراض آکسیالاری کئچیردی. یئرالتیندا فعالیت گؤسترن و سوء-قصدلر ایله ی.پ.گ سلاحلیلارینی اؤلدورن القیام حراکاتی منبیچ-ده قورولوب و ایلک فعالیتلرینی اوردا باشلادیب.
"زیتون دالی" عملیاتیندان سونرا تورکیهنین منبیچله علاقهلی آچیقلامالاری و حاضرلیقلاری امریکالی رسمیلر ایله تورک رسمیلر آراسیندا دیپلوماتیک گؤروشلرینی باشلاتدی. امریکانین سابیق خاریجی ایشلر ناظیری رکس تیلرسونون تورکیهیه سفری چرچیوهسینده منبیچ مسئله سینده راضیلیق الده ائتمک و بیرگه یول تاپا بیلمک اوچون تورکیه-امریکا بیرگه قروپو قورولدو. تیلرسوسونون وظیفهسینین باشا چاتدیریلماسی نتیجهسینده پروسئس لنگیسه ده مایک پومپئونون خاریجی ایشلر ناظیری اولماسی ایله پروسئس قالدیغی یئردن داوام ائتدیریلدی. تورکیه و امریکا بیرگه قروپونون معینلشدیردیگی اوچ مرحلهلی یول خریطهسی بارهسینده راضیلاشیلدی. یول خریطهسی چرچیوهسینده ی.پ.گ منبیچ بؤلگهسینی ترک ائدهجک، تورکیه و امریکا منبیچ بؤلگهسینه بیرگه نظارتی تعمین ائدهجک، اوچونجو مرحلهده ایسه بؤلگه یئرلی ساکینلرین ایدارئتمهسینه وئریلهجک.
تورکیه و امریکا آراسیندا منبیچله علاقهلی راضیلیق الده اولونماسی ایکی ناتو اؤلکهسی آراسینداکی گرگینلیگی آزالتما و امکداشلیغی گوجلندیرمه پتانسیلینه صاحبدیر. لاکین بیر نئچه نقطه معینلشدیریلن یول خریطهسی و ایکی طرفلی علاقهلر اوچون جدی میدان اوخومادیر. معین ائدیلن یول خریطهسی تطبیق ائدیلمهیهجگی تقدیرده، یعنی ی.پ.گ سلاحلیلاری منبیچدن چکیلمهیهجگی تقدیرده ایکی طرفلی علاقهلرده یئنی بحران باش وئرهجک. آیریجا ایکی اؤلکه آراسیندا هانسی تشکیلاتلارین و هانسی شخصلرین پ.کا.کا/ی.پ.گ ایله علاقهلی اولدوغو حل ائدیلمهسی واجیب اولان اهمیتلی پروبلئمدیر.
مثال اوچون منبیچ حربی شوراسی امریکانین آچیقلامالارینا گوزه، تامامیله موستقیل ایکن، عملی اولاراق بیرباشا قندیل طرفیندن ایستیقامتلندیریلیر. دیگر پروبلئم ایسه ی.پ.گ-نین فراتین شرقیندکی موجودلوغودور. تورکیه باخیمیندان منبیچدکی یول خریطهسینین مدل حالینا چئوریلمهسی و بوتون ی.پ.گ طرفیندن نظارت ائدیلن بؤلگهلرده تطبیقی واجیبدیر. نتیجهده ی.پ.گ ترور تشکیلاتینین فراتین شرقیندکی موجودلوغو دا تورکیهنین میللی تهلوکهسیزلیگینی تهدید ائدیر. امریکا ایسه منبیچ-ده تطبیق ائدیلن یول خریطهسینین فراتین شرقینده ده تطبیق ائدیلمهسینه اعتراض ائده بیلر. خصوصیله شرقی سوریه-ده ی.پ.گ طرفینن نظارت ائدیلن نفت ساحهلری باخیمیندان امریکا بئله بیر سناریونو تطبیق ائتمک ایستمهیه بیلر.
تورکیهنین خاریجی ایشلر ناظیری مولود چاووش اوغلو ایله امریکا خاریجی ایشلر ناظیری مایک پومپئونون منبیچ مسئله سینده راضیلیق الده ائتمهسی ایکی طرفلی علاقهلر اوچون بؤیوک فورصت اولسا دا، یول خریطهسینین تطبیق ائدیلمهسی و منبیچ پروسئسیندن سورا ایکی طرفلی علاقهلر اوچون بؤیوک امتحان اولاجاق.
"تورکیهنین گوندمینه دایر تحلیل" پروقرامینین نوبتی بؤلومونده سیاست، ایقتیصادیات و جمعیت آراشدیرمالاری فوندونون امکداشی جان آجونون "تورکیه ایله امریکا آراسیندا منبیچه دایر راضیلاشما" موضوع لو آنالیتیک یازینی تقدیم ائتدیک.