آوروپا بیرلیگی ایسراییلی پیسلهییب
آوروپا بیرلیگی ایسراییلین غزه-یه هوجوملاریندا یاردیم ایشچیلرینین اؤلدورولمهسینی پیسلهییب.
آوروپا بیرلیگی غزه-ده اینسانی یاردیم فعالیتلری گؤسترن World Central Kitchen (WCK) ایشچیلرینین ایسراییلین هوجوموندا اؤلدورولمهسینی پیسلهییب.
آوروپا بیرلیگینین (آی) خاریجی علاقهلر و تهلوکهسیزلیک سیاستی عالی نومایندهسی جوزپ بورلین و آوروپا بیرلیگی کمیسیونونون بحرانلارین ایداره ائدیلمهسی و اینسانی یاردیمدان مسئول عضوو یانز لنارچیچ سوسیال مئدیا پتلفرمو "ایکس" حسابیندا دونن ایسراییلین هوجوموندا اینسانی یاردیم ایشچیلرینین اؤلدورولمهسینه رئاکسیا وئریب.
جوزب بورل هوجومو پیسلییرم و آراشدیرمایا چاغیریرام. مولکی اهالینین و اینسانی ایشچیلرین ساوونماسی ایله باغلی بوتون طلبلره باخمایاراق، یئنه ده گوناهسیز اینسانلارین اؤلدوگونو گؤروروک"، بورل دئییب.
یانز لنارچیچ ده "غزه-ده اینسانی ایشچیلره قارشی نؤوبتی هوجومو قیناییرام. بونا سون قویولمالیدیر. درحال آتشکس" مئساژینی پایلاشیب.
اینگیلترهنین خاریجی ایشلر ناظیری دیوید کامرون دا ایسراییلی غزه-ده WCK امکداشلارینین اؤلدورولمهسی ایله باغلی درحال آراشدیرما باشلاتماغا چاغیردیقلارینی بیلدیریب.
میصر خاریجی ایشلر ناظیرلیگی ده هوجوملا باغلی عاجیل و جدی آراشدیرمایا چاغیریب.
لهستان خاریجی ایشلر ناظیرلیگی ده "اولوسلار آراسی اینسانی حقوقا و اینسانی ایشچیلر ده داخیل اولماقلا، مولکی شخصلرین (غزه-ده) ساوونماسینا محل قویولماماسینا اعتراض ائدیریک"، دئیه بیلدیریب.
قئید ائدک کی، امریکا-دا یئرلشن اولوسلار آراسی یاردیم تشکیلاتی WCK ایسراییلین غزه-یه دوننکی هوجومو نتیجهسینده 7 امکداشینین اؤلدوگونو بیلدیریب.
WCK-دان وئریلن آچیقلامادا "بو فاجعهدیر. اینسانی ایشچیلر و مولکی شخصلر هئچ واخت هدف اولمامالیدیر" دئییلیب.
ایسراییل اوردوسو ایسه وئردیگی آچیقلامادا بیلدیریب کی، حربچیلر بو تراژیک حادثهنین سببلرینی آنلاماق اوچون ان یوکسک سویهده هرطرفلی آراشدیرما آپاریر.