بمت اوکراینایا یاردیما چاغیریب

بیرلشمیش میللت‌لر تشکیلاتی (بمت) اوکراینا‌داکی محاربه‌دن ضرر چکن‌لره و اوکراینا‌لی قاچقین‌لارا دستک اوچون بو ایل 4،2 میلیارد دو‌لار یاردیم ائدیلمه‌سینه چاغیریب.

بمت-نین سوئیس-ین ژنو شهرینده‌کی اوفی‌سینده بمت-نین اینسانی مسئله‌لرین کووردیناسیون ایداره‌سی (OCHA) و بمت-نین قاچقین‌لار عالی کمیسارلیغی (UNHCR) طرفیندن 2024-جو ایل اوچون "اوکراینا بولگه‌سل قاچقین و اینسانی جاواب پلانی"نین ایشه سالینماسی اوچون مطبوعات کنفرانسی کئچیریلیب.

ایجلاسدا بمت باش کاتیبی‌نین اینسانی ایشلردن مسئول باش کاتیبین معاوینی فوق العاده حال‌لار اوزره کووردیناتورو مارتین گریفیتس و بمت-نین قاچقین‌لار عالی کمیساری فیلیپو گراندی چیخیش ائدیب‌لر.

روسیا ایله اوکراینا آراسیندا محاربه‌نین گلن آی اوچونجو ایلینه گیرجگینی خاطیرلا‌دان مارتین گریفیتس بو وضعیتین اؤلوم‌لره، اومیدسیزلیگه و قاچقین آخینینا سبب اولدوغونو وورغولاییب.

اوکراینادا 14،6 میلیون اینسانین (اها‌لی‌نین 40 فایزی) یاردیما احتیاجی اولدوغونو قئید ائدن مارتین گریفیتس "اوکراینادا 4 میلیون اینسان اؤلکه داخیلینده دیدرگین دوشوب" دئییب.

مارتین گریفیتس اوکراینادا تخمینن 3،3 میلیون اینسانین دؤیوش بؤلگه‌لرینده و بومباردمان آلتیندا یاشادیغینی ایفاده ائده‌رک، بونون تعجب‌لو درجه‌ده یوکسک رقم اولدوغونو وورغولاییب.

فیلیپو گراندی همچنین "بولگه‌سل قاچقین‌لارا رئاکسیا پلانی" چرچیوه‌سینده اوکراینایا 1،1 میلیارد دو‌لارلیق یاردیم چاغیریشی باشلاتدیق‌لارینی و 2،3 میلیون قاچقین و اونلاری قبول ائدن ایجما‌لارا چاتماغی هدفلدیک‌لرینی قئید ائدیب.

بمت اوکراینا بولگه‌سل قاچقین و اینسانی جاواب پلانی واسیطه‌سیله بو ایل 10،8 میلیون اینسانی دستکلمیی هدفلییر.