سوئد: تۆرکیهنین بۆتون طلبلرینی قارشیلایابیلمریک
"تۆرکیه، اوچلو مموراندوم چرچیوهسینده ائتدیکلریمیزی تایید ائدیر آنجاق اونلارا وئرهبیلمهیهجگیمیز و وئرمک ایستهمهدیگیمیزی شئیلر ایستهییر"
سوئدین باشباخانی اولف کریسترسون، اؤلکهسینین ناتو عضولوگو ایله باغلی تۆرکیهنین بۆتون طلبلرینی یئرینه یئتیرهبیلمهیهجکلرینی سؤیلهدی.
اولف کریسترسون، بیر دۆشونجه قورولوشونون تشکیل ائتدیگی کنفرانسدان سونرا وئردیگی آچیقلامادا، تۆرکیهنین، سوئدین ناتو عضولویو ایله باغلی اونلاردان وئرهبیلمهیهجکلری شئیلر ایستهدیگینی بیلدیردی.
سوئدین ناتو عضولویونون تۆرکیهنین الینده اولدوغونا دقت چکهن کریسترسون، "تۆرکیه (ژوئن آییندا ایسپانیادا ناتو ذیروه توپلانتیسیندا الده ائدیلن) اوچلو مموراندوم چرچیوهسینده ائتدیکلریمیزی تایید ائدیر آنجاق اونلارا وئرهبیلمهیهجگیمیز و وئرمک ایستهمهدیگیمیزی شئیلر ایستهییر. تۆرکیهنین بوتون طلبلرینین هامیسینی قارشیلایابیلمریک" ایفادهلرینی ایشلتدی.
ناتونون باش کاتیبی ینس ایستولتنبرگ ایسه، سوئد و فنلاندین تۆرکیه ایله ایمضالادیقلاری اوچبو مموراندوما عمل ائتدیگینی سؤیلهدی.
سوئدده گئچیریلهن بیر گوونلیک کنفرانسیندا دانیشان استولتنبرگ، سوئد و فنلاندین ناتویا عضولوک مراجعتلرینه توخوندو.
استولتنبرگ، اوچلو مموراندوم سایهسینده ناتونون سوئد و فنلاندی عضولویه دعوت ائتمه قراری آلدیغینی بیلدیررک،
"آنلاشمایا عمل ائدیلدیگینی گؤرمکدن سئوینجلییم" دئدی.
استولتنبرگ، ناتویا مراجعت ائتدیکدن سونرا ایکی اؤلکهیه بعضی ناتو متفیقلرینین گوونلیک ضمانتی وئردیگینی، ناتونون بؤلگهده وارلیغینی آرتیردیغینی، سوئد و فنلاندین آرتیق ناتو توپلانتیلارینا و بۆتونلشمیش حربی امکداشلیغینا داخیل اولدوغونو قید ائتدی.
باش کاتیب،
"سوئد و فنلاندین گوونلیگینین تهدید ائدیلمهسی حالیندا، ناتونون حرکته گئچمهمهسی دۆشونولهبیلمز" دئدی.