آلمانیا-دا داشقین‌لار نتیجه‌سینده اؤلن‌لرین سایی آرتماقدا داوام ائدیر

آلمانیادا راینلاند-فالتس، قوزیی نوردراین-وستفالن و بایرن ایالت‌لرینده گوجلو یاغیش‌لارین سبب اولدوغو سئل و داشقین‌لاردا اؤلن‌لرین سایی 171 نفره چاتیب.

آلمان خبر آژانسی‌نین (دپا) کوبلنز شهر پولیسینه اساسلاندیردیغی خبرده سئل فلاکتینده حیاتینی ایتیرن‌لرین سایی‌نین راینلاند-فالتس ایالتینده 122-یه چاتدیغی ایفاده ائدیلیب.

خبرده آروایلر دایره‌سیندن ایتکین دوشن 155 نفرین آختاریلدیغی و یارا‌لانان‌لارین سایی‌نین دا بو ایالتده 763 اولدوغو معلوماتی یئر آلیب.

قوزیی نوردراین-وستفالن ایالتینده داشقین‌لاردا حیاتینی ایتیرن‌لرین سایی‌نین 48-ا یوکسلدیگی بیلدیریلیب.

کلن شهر پولیسی‌نین آچیقلاماسیندا باد مونستریفئل قصبه‌سینده شخصیتی معلوم اولمایان بیر جسد تاپیلدیغی قئید ائدیلیب.

آچیقلامادا اول‌لر ایتکین دوشدوگو بیلدیریلن 850 نفردن چوخ اینسانلا تلفونلا علاقه قورولدوغو، حاضیردا بن/راین سیگ بؤلگه‌سینده 14، اوسكیرچن بؤلگه‌سینده ایسه 2 نفرین آختاریلدیغی بیلدیریلیب.

بایرن ایالتینده ایسه بیر نفر کیمی قئیده آلینان اؤلوم ساییندا هئچ بیر آرتیم اولماسا دا، اؤلکه‌ده سئل و داشقین‌لاردا اؤلن‌لرین سایی 171-ا چاتیب.

دیگر طرف‌دن، داشقین فلاکتی‌نین باش وئردیگی بؤلگه‌دکی یاردیم ایشلری و یا داشقین‌دان تأثیرلنن‌لرین اولدوغو توپلو  سیغینا‌جاق یئرلرینه گؤره یئنی نوع کوروناویروس (کووید-19) حال‌لاری‌نین آرتاجاغی ایله باغلی ناراحات‌لیق‌لار وار.

راینلاند-فالتس ایالتی‌نین ساغلیق ناظیرلیگی‌نین بو سبب‌دن داشقین‌دان تاثیرلنمیش اراضی‌لرده آشی کامپانیاسی تشکیل ائتمه‌یه حاضیرلاشدیغی قئید ائدیلیب.

داشقین‌دان تاثیرلنمیش اراضی‌لرده آختاریش-قورتارما، داغینتی‌لارین تمیزلنمه‌سی و تمیزلیک ایشلری داوام ائدیر.