امریکا کنگره سی قارشیسیندا اعتراضلار زامانی دؤرد نفر اؤلوب
واشینگتن حاکمیتی امریکا کنگره سی قارشیسیندا اعتراض آکسیالاری زامانی عمومیلیکده دؤرد نفرین اؤلدوگونو تصدیقلهییب.
امریکانین پایتاختی واشینگتن-دا پرزیدنت دونالد ترامپ طرفدارلارینین کنگره بیناسینا تشکیل ائتدیگی باسقیندان سونرا باش وئرن حادثه لرده 4 نفر حیاتینی ایتیریب، ان آز 52 نفر حبس ائدیلیب.
اؤلکهده 15 گونلوک فوق العاده وضعیت اعلان ائدیلیب.
امریکانین مئدیاسیندا یئر آلان خبرلرده فوق العاده وضعیتن 21 ژانویه تاریخینه قدر داوام ائدجگی بیلدیریلیب.
شهرده یئرلی واختلا ساعات 18.00-دان اعتبارا کوچهیه چیخما یاساغی اعلان ائدیلیب.
پایتاختدا اعتراض آکسیاسی کئچیرن دونالد ترامپ طرفدارلارینین بعضی لری کنگره بیناسینا داخیل اولوب. پولیس بینایا داخیل اولان اعتیراضچیلارا بیبر گازی ایله موداخیله ائدیب. بینادا باش وئرن حادثه لر زامانی بیر قادین سلاحلا یارالانیب. یارالانان قادینین اؤلدوگو بیلدیریلیب.
اؤلن قادینین کیملیگی بارده معلومات وئریلمهییب.
واشینگتن-ون پولیس بؤلمهسینین رهبری رابرت کونتی داها اوچ نفرین حیاتینی ایتیردیگینی بیلدیریب.
هلاک اولانلاردان بیرینین کیشی، 2-نین قادین اولدوغو و بو شخص لرین خستهخانالارین عاجیل شعبه لرینده اؤلدوکلرینی بیلدیرن رابرت کونتی اونلارین کمیلیکلرینی آچیقلاماییب.
کونتی آیریجا حادثه نتیجه سینده 14 پولیسین یونگول یارالاندیغینی و ان آز 52 نفرین حبس ائدیلدیگینی بیلدیریب.
تهلوکهسیزلیک قوه لری کنگره بیناسینین یاخینلیغیندا پارتلاییجی مادنین آشکار ائدیلدیگینی و ضررسیزلشدیریلدیگینی آچیقلاییب. یارانمیش قاریشیقلیغا گؤره کئچیریلن پرزیدنت سئچکیلرینین نتیجه لرینین موذاکیره اولوندوغو ایجلاس دایاندیریلیب و ایجلاسا رهبرلیک ائدن باشقان یاردیمجیسی مایک پنس بینادان چیخاریلیب. قانونوئریجی اورقانین نومایندلری بینادان تخلیه اولونوب. باش وئرن حادثه لر نتیجه سینده چوخ سایدا پولیس امکداشینین دا یارالاندیغی بیلدیریلیب.
نیویورک والیسی آندرو کومو توییتر حسابیندان "امریکا میللی محافیظ لرینین طلب ایله نیویورک-دان مین میللی محافیظی ایکی هفته لیگینه پایتاخت واشینگتن-دا یئرلشدیریرم" دئییب.
امریکانین یئنی سئچیلمیش پرزیدنتی جو بایدن مطبوعات کنفرانسی تشکیل ائدرک امریکا دموکراسیسی و حقوقون استونلوگونه قارشی هوجوملارین دایاندیریلماسی ایله علاقه دار چاغیریش ائدیب.
جو بایدن دونالد ترامپا مراجعت ائدرک دئییب: "کامرالارین قارشیسینا چیخمالیدیر و کنگره بیناسینداکی محاصیره نین قارشیسینی آلمالیدیر".
پنسیلوانیا والیسی تام وولف رسمی توییتر صحیفه سینده وئردیگی آچیقلامادا پایتاخت واشینگتن-دا اعتیراضچیلارین کنگره بیناسینا داخیل اولماسینی "‘چئوریلیشه جهد" آدلاندیریب.
معلوماتا گؤره، دونالد ترامپ تهلوکهسیزلیک قوه لرینه کنگره بیناسینداکی حادثه لرین قارشیسینین آلینماسی ایله علاقه دار گؤستریش وئریب.
دونالد ترامپ رسمی اینترنت صحیفه سینده اعتیراضچیلارا مراجعت ائدرک دئییب: "سئچکی نتیجه لرینی اوغورلادیلار. آنجاق ایندی سیز ائوینیزه گئتمه لیسینیز.
دونالد ترامپ حادثه لر باشلامازدان اوول وئردیگی بیاناتدا سئچکی نتیجه لرینی قبول ائتمهیهجگینی و موباریزه آپارماغا داوام ائدجگینی بیلدیرمیشدی.