غزه-ده هلاک اولان فیلیسطین-لیلرین سایی 33 مینی اؤتوب
ایسراییلین غزه-یه شدتلی هوجوم‌لاری داوام ائدیر.
ایسراییلین اوکتبرین 7-دن بری غزه زولاغینا تشکیل ائتدیگی هوجوم‌لاردا حیاتینی ایتیرن فیلیسطین‌لیلرین سایی 33037-یه، یارا‌لانان‌لارین سایی ایسه 75668-ا یوکسلیب.
ایسراییل 181 گوندور غزه زولاغینی بومبالاییر.
ایسراییل قوه‌لری مولکی یاشاییش منطقه‌لرینی و عبادت یئرلرینی هدف آلیر، همچنین یاردیم تشکیلات‌لارینین کاروان‌لارینی و اینسانی یاردیم امکداش‌لارینی وورور.
بؤلگه‌ده‌کی بومباردمانین داوام ائتدیگی و هر کئچن ساعات جان ایتکیسی‌نین آرتدیغی بیلدیریلیر.
فیلیسطین ساغلیق ناظیرلیگیندن وئریلن آچیقلامادا سون 24 ساعاتدا حیاتا کئچیریلن هوجوم‌لاردا داها 62 فیلیسطین‌لی‌نین حیاتینی ایتیردیگی، 91 فیلیسطین‌لی‌نین ایسه یارالاندیغی قئید اولونوب.
سون هوجوم‌لاردا قئیده آلینان ایتکی‌لرله، ایسراییلین اوکتبرین 7-دن اعتباراً حیاتا کئچیردیگی هوجوم‌لاردا حیاتینی ایتیرن‌لرین سایی‌نین 33037-یه، یارا‌لی‌لارین سایی‌نین ایسه 75668-ا یوکسلدیگی بیلدیریلیب.
حماس مقاومت حرکاتی‌نین سیاسی بوروسونون رهبری اسماعیل هنیه ایسراییل ایله آتشکس دانیشیق‌لاری ایله باغلی دئییب:
"بیز اؤز طلب‌لریمیزه صادیقیک. دایمی آتشکس تامین اولونما‌لی، دوشمن غزه زولاغیندان تامامیله چیخاریلما‌لی، بوتون کؤچکون‌لر اؤز ائولرینه قاییتما‌لی، غزه-ده خالقیمیزا لازیم اولان بوتون یاردیم‌لارین گؤستریلمه‌سینه ایجازه وئریلمه‌لی، غزه زولاغی یئنیدن قورولما‌لی، محاصیره و اسیر موبادیله‌سی موقاویله‌سی باغلانما‌لی".
قطرین خاریجی ایشلر ناظیری محمد بن عبدالرحمن آل ثانی غزه-ده آتشکس اوچون آپاریلان دانیشیق‌لارین فیلیسطین اراضی‌لرینین موختلیف بؤلگه‌لرینه کؤچکون‌لرین قاییتماسی قونوسوندا چیخمازا گیردیگینی بیلدیریب.
دانیشیق‌لارلا باغلی آچیقلاما وئرن آدی آچیقلانمایان بیر یئتکیلی "حماس"ین خالقی قوزئییه دؤنه بیلمه‌سینی طلب ائتدیگینی، ایسراییلین ایسه کؤچکون فیلیسطین‌لیلرین سربست حرکت ائتمه‌لرینی ایسته‌مه‌دیگینی بیلدیریب.
