لیبیا تورکیه-یه تشککور ائدیب
لیبیا داشقینلارلا علاقهدار وئردیگی دستکهیه گؤره تورکیه-یه تشککور ائدیب.
لیبیا پرزیدنت شوراسینین صدر معاوینی موسی الکونی اؤلکهده باش وئرن داشقینلارلا علاقهدار وئردیگی دستکهیه گؤره تورکیه-یه تشککور ائدیب.
پرزیدنت شوراسیندان وئریلن یازیلی آچیقلامادا موسی الکونینین پایتاخت طرابلس-دا تورکیه خاریجی ایشلر ناظیرلیگینین رسمیلری فرید اورجون باشاران و حسین بارباروس دیکله ایله گؤروشدوگو بیلدیریلیب.
آچیقلامادا وورغولانیب کی، تورکیه-دن گلن نوماینده هئیتی لیبیانین دوغوسوندا، خصوصیله درنا شهرینده حیاتی فلج ائدن داشقینلار نتیجهسینده حیاتینی ایتیرنلرله علاقهدار جمهور باشقانی رجب طیب اردوغان و تورکیه آدیندان باش ساغلیغی وئریب.
لیبیا پرزیدنت شوراسینین صدر معاوینی موسی الکونی دئییب: "تورکیه لیبیا خالقینین اوزلشدیگی بوتون چتینلیکلره قارشی دستکینی ایفاده ائدهرک طبیعی فللاکتدن سونرا بؤلگهیه گؤندردیگی آختاریش-قورتارما قروپلاری ایله ایتکین دوشنلرین تاپیلماسینا بؤیوک تحفه وئریب.
موسی الکونی وئردیگی دستکهیه گؤره تورکیه-یه منتدار اولدوقلارینی بیلدیریب.
تورکیه پرزیدنتی رجب طیب اردوغان تورکیه-نین طبیعی فلاکتله موباریزهده هر زامان دوست و قارداش لیبیا خالقینین یانیندا اولدوغونو وورغولاییب.
سپتامبرین 10-دا مرکزی آغ دنیزینده طغیان ائدن و لیبیا-نین دوغوسوندا حیاتی فلج ائدن "دانیل" فیرتیناسی بنغازی، بیضاء، معراج، شوش و درنه شهرلرینده داشقینلارا سبب اولوب.
لیبیانین رسمی لانا خبر آژآنسی درنه شهرینده داشقین نتیجهسینده اؤلنلرین سایینین 5300-ا یوکسلدیگینی و مینلرله اینسانین ایتکین دوشدوگونو آچیقلاییب.
لیبیا قیزیل آی جمعیتینین سؤزچوسو توفیق شوکری داشقینلار سببیندن بؤلگهدن کؤچ ائدن عائلهلرین سایینین 20 مین اولدوغونو تخمین ائتدیکلرینی قئید ائتدی.
لیبیا میللی بیرلیک حکومتینین باش ناظیری عبدالحمید دیبیبه داشقینلارلا علاقهدار دونن اؤلکهده 3 گونلوک ماتم اعلان ائدیب، لیبیا پرزیدنت شوراسی ایسه داشقینلاردان ضرر چکمیش بؤلگهلر اوچون قارداش اؤلکهلر و اولوسلار آراسی قوروملاردان کؤمک ایستهییب.