600 ğailägä yärdäm öläştelär

Törek xezmättäşlege häm koordinaśiyä agentlığı idaräse TİKA Äfğanstannıñ könbatışında moxtaclıqta yäşäwçe 600 ğailägä azıq-tölek yärdäme cibärde. Bu Ramazan ayı êşçänlekläre qısalarında ütkärelä. Yärdämnärne Härat, Nimruz, Farax häm Badgis töbäklärendä yäşäwçelärgä öläşälär.

Här ğailägä 2 ayğa citärlek on, döge, üsemlek mayı, borçaq, yäşel yasmıq, tomat sousı, çäy häm şikär şikelle töp tovarlar birelä. Azıq-tölek öläşkändä invalidlar, qartlar häm tol xatın-qızlarğa östenlek kürsätelä.  

Yärdämnär Ramazan ğayetendä dä däwam itäçäk. Ay buyı 30 tonnadan artıq gumanitar yärdämneñ moxtac ğailälärgä taratıluı belderelde.