Sädat Önal: “Ğazzädä açlıq sörän sala"

İlçe Önal BMO İminlek Şurasında oyıştırılğan "Klimat üzgäreşläreneñ azıq-tölek qurqınıçsızlığına yoğıntısı” temalı yuğarı däräcäle utırışta çığış yasadı.

Dön’yanıñ üzgä, qatlawlı häm üzara bäylängän sınawlar belän köräş alıp baruına iğ’tibarnı yünältüçe Önal çişeleş öçen näticägä yünältelgän urtaq ğamäl zarurlığın iskärtep uzdı.

Berläşkän Millätlär Oyışması İminlek Şurasınıñ 2 meñ 417 nomerlı qararınıñ bäreleşlär häm azıq-tölek qurqınıçsızlığı arasındağı bağlanışlarnı bilgeläwen belderüçe Önal: "Bu qarar belän Şura suğış taktikası bularaq tınıç xalıqnıñ aç qaldırıluın häm humanitar yärdämgä ireşüneñ totqarlanıluın kisken räweştä gäyepläde. Bigräk tä Ğazzä, Süriyä, Yämän, Ukraina häm Afrikanıñ qayber töbäklärendä qararnıñ êffektiv räweştä ütälüe bik möhim”, - dip bäyäläw yasadı.

Tulı wäqalätle ilçe Önal citärle humanitar yärdäm bulmağan çaqta Ğazzädä 2 million 200 meñ keşeneñ tuqtawsız İzrail bombalawı astında buluına iğ’tibarnı yünältep: "Ğazzädä açlıq qurqınıçı sörän salırlıq däräcädä”, - dip äytte.

Ber ük waqıtta qayber illärneñ Ğazzädäge humanitar yärdäm operaśiyäläreneñ tayanıçı bulğan BMO Yaqın Könçığıştağı Fälästin qaçaqlarına yärdäm häm tözekländerü agentlığına fondların tuñdıruın xäterlätüçe Önal: "Fäqät (Xamas-İzrail arasındağı) tartqalaşunıñ bişençe ayında BMO İminlek Şurası äle haman şuşı keşe qulı belän buldırılğan faciğäne tuqtata almadı. Bez çığış yasağan çaqta Ğazzäneñ kön’yağındağı Rafaxta xalıqara cämäğätçelekneñ böten kisätülärenä qaramastan tragediyäneñ yaña pärdäse açıla. Şuranıñ Ğazzädäge fär’yadqa qolaq saluı kiräk”, - dide.

Önal, Şuranıñ aşığıç räweştä humanitar utnı tuqtatu belän özleksez humanitar yärdän tämin itüe häm üz cirlärennän mäcbüri küçerüneñ totqarlanıluınıñ zarurlığın iskärtep uzıp, axır çiktä ike däwlätle (Fälästin häm İzrail) säyäsi çişeleşneñ böten tırışularınıñ öleşe buluı zarurlığın assızıqladı.

İlçe Önal Törkiyäneñ tınıçlıq, klimat üzgäreşläre belän köräş häm azıq-tölek qurqınıçsızlığın yuq itüne maqsat itep alğan böten xalıqara tırışularnı yaqlarğa däwam itäçägenä basım yasadı.