Türkiyädän Liviyägä yärdämnär kitä
Urta diñgezdä barlıqqa kilgän häm 10nçı sentyabr’dä Liviyanıñ könçığışına bärgän “Daniêl’” ğarasatı ilgä zur zıyan saldı
Türkiyä sälamätlek saqlaw ministrı Fäxrettin Koca tağın 148 mediśina xezmätkäreneñ su basu afäte kiçergän Liviyägä kitäçägen äytte. Ul sośial’ media aşa yasağan belderüendä hälakättän soñ uq älege ilgä 2 aşığıç yärdäm blogı, mediśina kiräk-yaraqları, generatorlar, darular häm cihazlar belän bergä 11 keşelek qotqaruçı tabiblar törkeme cibärelüen xäterlätte. Yañadan kitäçäk törkem belän bergä 159 mediśina xezmätkäre Liviya xalqınıñ yanında bulaçaq. Monnan tış, tulısınça cihazlandırılğan 2 qır xastaxanäse häm 6 aşığıç yärdäm blogı, 10 aşığıç yärdäm maşinası, 7 maxsus cihazlandırılğan texnika häm başqa yärdäm çaraları şul korab belän yulğa çıqqan.
Şul uq waqıtta, Törek xezmättäşlege häm koordinaśiyä agentlığı TİKA Liviyadağı “Daniêl” dawılınnan soñ bulğan su basu hälakäte säbäple cirlekkä çista su häm ênergiyä birüçe azıq-tölek tutırılğan 5 meñ qap cibärde. Oyışmadan yasalğan yazmaça belderügä qarağanda, yärdämnär afättän zıyan kürüçelärgä taratu öçen Liviyä Qızılayına tapşırılğan.
İsegezgä töşeräbez, Urta diñgezdä barlıqqa kilgän häm 10nçı sentyabr’dä Liviyanıñ könçığışına bärgän “Daniêl’” ğarasatı arqasında barlıqqa kilgän taşqınnarda 6 meñ keşeneñ ülüe, meñnärçä keşeneñ isä yuqqa çığuı belderelde.
