"Süriyäle migrantlar kire cibäreläçäk"

Türkiyä tışqı êşlär ministrı Mäwlet Çavuşoğlu süriyäle sıyınuçılarnıñ illärenä kire qaytuı öçen reginnıñ terrorçılıqtan çistartıluı kiräklegen, Äsäd belän xezmättäşlek urnaştırmıyça möhacirlärne cibärüneñ yalğış bulaçağın belderde. Ul ber şäxsi telekanalda könüzäk mäs’älälär belän bäyle sorawlarğa cawap birde.

Çavuşoğlu Süriyädäge grajdannar suğışı häm Äfğanstandağı wäzğıyät’ arqasında Türkiyägä migrant kilüen belderde. Ul bik küp äfğannıñ illärenä kire cibärelüen citkerde. Ministr 550 meñ süriyäleneñ dä watannarına qaytıp kitüen, bu sannıñ citärlek bulmawın, tağın da kübräk möhacirneñ cibäreläçägen assızıqladı.

“Barı imin töbäklärgä genä tügel, rejim kontrolendäge cirleklärgä dä cibärergä kiräk. Yağ’ni qaysı şähärdän kilgän bulsalar – şunda. Bez rejim belän êlemtägä kerdek, söyläşü başladıq, tik monıñ öçen başta infrastruktura buldıru qararı çığardıq,”-dide ministr. Ul migrantlarnı kire cibäräçäklären, tik monı keşelekle räweştä başqarırğa uylawların söyläde. Alarnıñ kire qaytuı öçen asqormanıñ äzerlänüe häm iminlekläre täêmin itelüe, BMOnıñ bu êşkä kereşüe häm xalıqara cämäğat’çelekneñ yaqlawı kiräklege assızıqlandı.  Çavuşoğlu bolardan tış başqa çınbarlıqnıñ da buluın äytte. “Süriyäle möhacirlärneñ barısın 100% kire cibäräçäkbez disäk, bu döres bulmas. Türkiyäneñ xäzerge waqıtta awıl xucalığı tarmağında, sänäğat’tä, qayber êşlärdä êş köçenä ixtiyacı bar, küräbez,”-dide ministr.