Törki däwlätlär oyışması citäkçese Bryussel’dä

Türkiyäneñ Awrupa Berlege daimi wäkile, tulı wäqalätle ilçe Faruk Kaymakcı Ğomum särkätip Ömüraliyıvneñ Bryussel’ säfäre mönäsäbäte belän kiçä oyıştırdı.

Kiçädä Törki däwlätlär oyışmasına äğ’za illär belän küzätüçe illärneñ ilçeläre belän bergä Awrupa Berlege komissiyası, Awrupa Parlamentı, Awrupa Berlege şurasınnan wäkillär belän küp sanda qunaq qatnaştı.

Kiçädä çığış yasawçı Ömüraliyıv, Törki däwlätlär oyışmasınıñ Awrupa Berlege oyışmalarına kilüçe berençe ğomum särkätibe buluın belderep: "Bu säfär Törki däwlätlär oyışmasınıñ töbägendä häm xalıqara mäydandağı artqan säyäsi roleneñ kürsätkeçe”, - dip äytte.

Ömüraliyıv wazıyfası waqıtında Törki däwlätlär oyışması-Awrupa Berlege mönäsäbätläre öçen nıq nigezneñ buldırıluı häm Awrupa Berlege oyışmaları belän xezmättäşlek urnaştırıluı öçen êşläyäçägen belderde.

Törki däwlätlär oyışması äğ’zaläreneñ ênergiya täêminatında häm qurqınıçsızlığında möhim urını buluın, Aziya belän Awrupa arasında ähämiyätle tranzit yünäleşe buluın xäterlätüçe Ömüraliyev: "Törki däwlätlär global’ azıq-tölek häm ênergiya qurqınıçsızlığı belän özleksez towar täêminatın buldıruğa äzer”, - dip äytte.

Türkiyäneñ Awrupa Berlege daimi wäkile, tulı wäqalätle ilçe Kaymakcı da törek cämğıyätläreneñ barı tik Urta Aziyada häm Anadoluda ğına tügel, Ukraina, Balkan häm Awrupa kebek kiñ geografiyada da buluın xäterlätte.

Kaymakcı: "Urta Aziya häm törki dönya Awrupa öçen bigräk tä transport, ênergetika kebek ölkälär belän ber rättän tınıçlıq häm totrıqlılıq öçen dä ähämiyätle. Şuña kürä Törki däwlätlär oyışmasınıñ Bryussel’dä tağın da kübräk barlığınıñ buluı, Awrupa Berlegeneñ Törki däwlätlär oyışması belän tağın da yaxşıraq häm struktur mönäsäbätlärne üsterüeneñ zarurlığına ışanabız”, - dip bilgeläp uzdı.