“Anadolujet” İzmir-Baqı oçışlarına başladı

THY matbuğat bülegennän yasalğan belderügä kürä, 16nçı iyün’ könennän başlap İzmir Adnan Mändäräs hawa mäydanı häm Heydär Äliyıv Xalıqara aêroportı arasında ike yaqlı yasalaçaq oçışlar atnanıñ 3 könendä başqarıla.

Belderüdä qaraşlarına urın birelgän THY Ğomum mödire (säwdä) urınbasarı Käräm Sarp, qardäş il Azärbaycan belän bulğan bağlanışlarnı yaña oçış noqtası belän tağın da köçäytüdän qanäğätlelegen citkerep: "Bez ber millät ike däwlät bularaq kürgän qardäş xalıqlarnı başqala Baqığa İstanbul häm Änkaradan soñ İzmir aşa totaştırıp, Türkiyä häm Azärbaycan arasındağı säwdä häm mädäniyät duslığınıñ da nığuına mömkinlek buldırabız,” – dip äytte.

Qavqaznıñ iñ möhim mädäniyät häm säwdä märkäze bulu üzençälege belän alğı planğa çıqqan Baqıda BMOnıñ Mäğarif, belem häm mädäniyät oyışması YUNESKOnıñ Dön’ya mirası isemlegenä kertelgän "Şirvanşaxlar sarayı", "Qız manarası" häm bronza çorına qarağan qorallar häm bizänü äyberläre saqlanuçı "Kobustan şähär parkı”na bik küp keşe kilä.

Şifa çığanağı buluı uylanılğan balçıq vulkannarı isä turistlarnıñ häm tikşerenüçelärneñ iğ’tibarın cälep itä. Başqala Baqı “AnadoluJet” qunaqçıllığı belän açışın kötä.

“AnadoluJet”neñ İzmir-Baqı reysları turında tafsille mäğ’lümatne "anadolujet.com" internet säxifäsennän häm "0850 333 2 538" telefon nomerlı beleşmä üzägennän alırğa bula.