Äliyıv: “TANAP häm TAP kiñäytelergä tiyış”

İlham Äliyıv 28nçe Xalıqara Xäzär neft’ häm tabiğıy gaz yärminkäse belän 11nçe Xalıqara Xäzär ênergetika häm yañartıla alınğan ênergiya yärminkäsen üz êçenä alğan Baqı ênergetika atnalığınıñ açılışında qatnaştı.

Çarada çığış yasağan Äliyıv Azärbaycannıñ 1990nçı yıllardan birle alıp barğan neft’ häm tabiğıy gaz säyäsätenä tuqtalıp uzıp: "Könbatış urtaqlarıbıznıñ öleşe belän Awraziyanıñ ênergetika kartasın üzgärtkän çeltär tözedek. Azärbaycan häm êşläp çığaruçı, häm tranzit, häm qullanuçı bularaq üzen qurqınıçsızraq xis itä. Ênergiya qurqınıçsızlığı bügen milli iminlekkä tiñ,” – dip äytte.

Awrupa belän ênergetika ölkäsendäge mönäsäbätlärgä dä tuqtalıp uzuçı İlham Äliyıv: "Awrupağa 2022nçe yılda 8 milliard kub metr, 2023nçe yılda 12 milliard kub metr tabiğıy gaz êksportladıq. Çığanaqlarıbız isäpkä alınğan çaqta bu san 2027nçe yılda kim digändä 20 milliard kub metrğa citäçäk,” – dide.

Awrupa'da Azärbaycan gazına soraw-taläpneñ artuın, Bolgariya, Rumıniya, Vengriya (Macarstan), Serbiya kebek illärneñ dä Azärbaycannan gaz aluların häm alaçaqların citkerüçe Äliyıv:

"Başqarılaçaq küp êş bar. TANAP häm TAP kiñäytelergä tiyış. Awrupada ike aradağı bäyläneşlärneñ (interkonnektorlarnıñ) sanı arttırılırğa, böten bu êşlär koordinaśiyalı räweştä alıp barılırğa tiyış. Çönki bez êşläp çığaraçaq gaznı qayda sataçağıbıznı belergä tiyış,” – dip belderde.

Türkiyä neft’läre akśionerlıq cämğıyäte (TPAO) da iganäçeläre arasında bulğan Baqı ênergetika atnalığı qısalarındağı yärminkälärdä 37 ildän 326 şirkät qatnaşa.

28nçe Xalıqara Xäzär neft’ häm tabiğıy gaz yärminkäse belän 11nçe Xalıqara Xäzär ênergetika häm yañartıla alınğan ênergiya yärminkäse 2nçe iyün’ comğa könenä qadär däwam itäçäk.