Äliyıv: “Azçılıqlar – töp qanun ışanıçı astında”

Äliyıv başqala Baqıda oyıştırılğan 10nçı Global’ Baqı forumınıñ açılışında yasağan çığışında Ärmänstan belän Azärbaycan arasındağı problemalar häm 2nçe Qarabax suğışı turında süz alıp bardı.

Dön’yadağı bäreleşlärneñ suğış yäki tınıçlıq yulı belän tögällänüen belderüçe Äliyıv: “Bez Ärmänstannıñ Berläşkän Millätlär Oyışması İminlek Şurasınıñ “Ärmänstan ğaskäreneñ Azärbaycan cirlärennän şartsız räweştä çığuı zarurlığı” turındağı qararların ütäwen telädek. Fäqät Ärmänstan bu qararlarnı iğ’tibarsız qaldırdı. Çişeleş öçen tözelgän OSCE Awrupa iminlek häm xezmättäşlek oyışmasınıñ Minsk törkeme dä bernindi näticägä ireşä almadı. Bez dä döres dip belgänne êşlädek. Üz cirlärebezne köç qullanıp kire aldıq,” – dip äytte.

Äliyıv, Ärmänstannıñ okkupaśiya waqıtında Azärbaycan cirlärendä yasağan cimerülärgä dä tuqtalıp uzıp: "Azärbaycan xalqınıñ üç alu öçen ruxıy xoquqı bar. Fäqät bez suğış qırında üç aldıq. Bernindi xärbi cinayät yasamadıq. Ärmänstan kebek genośid yasamadıq. Xäzer isä tınıçlıq waqıtı. Suğıştan soñ tınıçlıq urnaştıra alırbız, dip ışanabız,” – dide.

Äliyıv Azärbaycandağı ärmän xalqı belän bäyle bularaq isä: "Azärbaycanda böten azçılıqlar töp qanun ışanıçı (konstituśion garantiya) astında. Törle dini häm êtnik törkemnär Azärbaycanda tınıçlıq êçendä häm xörmät belän yäşi. Azärbaycannıñ Qarabax töbägendäge ärmännärneñ tormışı da yaw çorınnan tağın da yaxşıraq bulaçaq,” – dip äytte.