Caparov ileneñ êzläw-qotqaru törkemenä räxmät belderde
Qırğızstan İlbaşı Sadır Caparov 6nçı fevral’dä barlıqqa kilgän Kahramanmaraş êpiśentrlı cirteträwlärdän soñ Türkiyägä kilep êzläw-qotqaru êşçänlegenä quşılğan törkemgä räxmät äytte
İlbaşı Caparov tarafınnan kabinetında qabul itelgän Qırğızstan ğadättän tış xällär ministrı Boobäk Ajikeyıv ministrlıqnıñ Türkiyädäge cirteträwlärdän soñ êzläw-qotqaru êşçänlege turında mäğ’lümat birde.
Caparov, Türkiyädä barlıqqa kilgän tabiğıy afätneñ cimergeç näticäläre buluın häm qardäş däwlätkä zur zarar birüen belderep: "Bu urtaq qayğı härkemne Türkiyä xalqına yärdäm qulın suzu öçen bergä cıydı. Professional’, yaxşı koordinaśiyälängän häm êffektiv êşçänlek öçen qotqaru törkemeneñ äğ’zalärenä räxmätläremne citkeräm,” – dip äytte.
Caparov Ajikeyıvqa êzläw-qotqaru êşçänlegendä wazıyfa alğan keşelärneñ büläkländerelüe boyırığın birde.
Ajikeyıv ta, Ğadättän tış xällär ministrlığınıñ tarixında berençe tapqır êzläw-qotqaru törkemeneñ çit ildäge êşçänlektä qatnaşuın citkerep:
"Qırğızstan êzläw-qotqaru törkeme tormışların risk astına quyıp cimereklär astında qaluçılarnı qotqarırğa tırıştı. Qotqaru êşçänlegendä balalar belän bergä 8 keşene tere kileş qotqardıq häm 198 keşeneñ mäyıtenä ireştek. Zilzilä töbägendä 124 çatırdan torğan çatır şähärçegen urnaştırdıq,” – dip belderde.
Kahramanmaraş belän Hataydağı êzläw-qotqaru êşçänlegendä qatnaşuların äytüçe Ajikeyıv êşçänleklärenä törek matbuğatınıñ zur iğ’tibar kürsätüen iskärtep uzdı.
Qırğızstan törkeme kiçä ildä tantana belän qarşı alınğan ide.
Bäyläneşle xäbärlär
Ärmänstan belän Azärbaycan Qazaqstanda oçraşa
İke yaqnıñ tışqı êşlär ministrları Almata qalasında küreşep söyläşäçäk