"Törkiyä belän Azärbaycannıñ bergälege - bezneñ xalıqlar öçen töp yul kartası"

Azärbaycan ilbaşı İlham Aliyev Baqıda Törkiyä ilbaşı Räcäp Tayyip Ärdoğan da qatnaşqan “Aviaśiya, ğaläm häm texnologiya festivale TEKNOFEST Azärbaycan” çarasında çığış yasadı.

Aliyev äytüençä, Azärbaycan xalqı 104 yıl êlek bäysezlek alğan, läkin ul barı tik 2 yıl däwam itkän.

”1990 nçı yıllar başında bäysezlek yañadan torğızıldı. Bez 30 yıl möstäqil’ yäşibez. Bu 30 yıl êçendä bezneñ belän harwaqıt törek qardäşlärebez bar ide. Bez bu yärdämne, yaqlawnı 30 yıl sizep yäşädek häm bügen dä anı toyabız. Bügen Törkiyä belän Azärbaycan tağın bergä” dide ul.

İlham Aliyev:” Törkiyä belän Azärbaycannıñ bergälege,berdämlege - bezneñ xalıqlar öçen töp yul kartası. Bu töbäk häm dön’ya öçen bik möhim. İke il niqadär ışanıp bergä êşläsä töbäktä tınıçlıq häm totrıqlılıq da şulxätle nıq bulaçaq. Bez häm böten dön’ya monı 2 nçe Qarabax suğışında kürdek”,- dide.

Aliyev Qarabax suğışınıñ berençe säğät’lärendä Ärdoğannıñ “Azärbaycan yalğız tügel. Törkiyä anıñ yanında” dip äytkän süzläreneñ alarğa köç häm ışanıç birgänen , Azärbaycan xalqınıñ bu yärdämne berqayçan da onıtmayaçağın assızıqladı.

Azärbaycan ilbaşı İlham Aliyev üz çığışın “Yäşäsen Törkiyä  - Azärbaycan berdämlege häm qardäşlege. Qarabax-Azärbaycan” digän süzlär belän tämamladı.