Törek matbuğatına küzätü 08.10.2021

“Xäbär türk” gazetı yazğança Törkiyäneñ tışqı êşlär ministrlığı İzrail mäxkämäseneñ yähüdlärneñ Äl-Aqsa mäçetendä tınıç qına ğıybadät qıluların raslawın qırıs räweştä ğayepläde.

Xäbärdän kürengänçä açıqlawda tübändäge yullar urın ala: “Xalıqara cämäğat’çelekne bu yalğış, xoquqsız, qurqınıç qararğa häm Äl-Aqsa mäçetenä qarağan barlıq provokaŝiyalärgä qarşı torırğa çaqırabız.”

“Xörriyät” basması beldergänçä Angliya aralarında Törkiyä dä bulğan 37 ildän vakŝinaŝiyalängän yulçılarnı ilenä qabul itäçägen citkerde. Moña kürä Angliya raslağan Kovid-19 vakŝinaların yasatuçılar 10 könlek karantinda totılmayaçaq.

Xäbärgä kürä Angliyağa kitkänçe kim digängä 14 kön aldan Oxford/Astra Zeneka, Pfayzer-Biontek, Moderna häm Janssen vakŝinalarınnan bersen saylap, 2 dozasın yasatırğa kiräk.

“Yeni Şafak” gazetı citkergänçä Törkiyädäge Daru häm mediŝina cihazı oyışması cirle vakŝina Turkovaknı qullanunı rasladı. 2 doza Sinovak vakŝinasın yasatqan keşelärgä kiçä 3nçe doza itep Turkovak qadala başlandı.

“Star” basması xäbärenä kürä Qazaqstan bu yılnıñ berençe yartısında ilgä turıdan kertelgän investiŝiyalär külämen açıqladı. Törkiyäneñ Amerika Quşma Ştatları häm Şveyŝariyadan soñ Qazaqstandağı investiŝiyalären iñ küp arttırğan öçençe ilgä äylänüe belderelde.

“Sabah” gazetı yazğança Kovid-19 kizüennän soñ könbatışlı şirkätlärneñ waz kiçelmäs täêmin itüçesenä äylängän Törkiyä ber-ber artlı dön’yadağı zur şirkätlärdän kertelgän investiŝiyalär belän üzenä iğtibar cälep itä başladı. Soñğı investiŝiya xäbäre alman moda şirkäte X’yugo Bosstan kilde. X’yugo Boss kiläse yılda Törkiyädä tağın meñ keşene êş belän täêmin itäçäk.