Kön sayın cäyäw yörim

“Nigä? Çönki” tapşıru tezmäbezneñ bu çığarılışında sälamätlegebez öçen ähämiyätle ber fizik ğamäl xaqında süz baraçaq. Süzemne “Min kön sayın daimi räweştä yörim, çönki…” dip başlıym.

Gäwdäbezdäge sistemalar üz êçlärendä dä, ber-berse belän dä yaraşıp êşli. “Sälamätlek” süze, ber qaraşqa, älege garmoniyäneñ bilgelämäse. Funkśiyälärdäge özekleklär isä awırular barlıqqa kiterä. Bügenge mediśina xastalıqlarnı däwalaw yulları qadär ük älege çirlärne buldırmawğa da ähämiyät birä. Monıñ öçen keşelärneñ fizik aktivlığın, tuqlanu häm yoqı rejimnarın tağın da näticäle itüçe täq’dimnär bar. Barlıq gäwdäne xäräkätkä kiterep, anı çınıqtıruçı çaralarnıñ iñ başında daimi cäyäw yörü tora.   

Bötendön’ya sälamätlek saqlaw oyışması, yäşenä qaramastan, atnada kimendä 2 säğat’ yarım cäyäw yörergä kiñäş itä. İñ şäbe isä köndälek yartı säğat’ yörep atnada 3 yarım säğat’kä tutıru. Çönki daimi yörü yöräk sälamätlegennän başlap bik küp alanda ähämiyätle rol’ uynıy. Ul qan äyläneşen tärtipkä salıp, metabolizmnı tizlätä häm artıq tazaruğa yul quymıy. Monnan tış, cäyäw yörü muskullarnı nığıtıp buınnarnıñ sığılmalığın arttıra, şuña kürä ul skelet sisteması öçen dä ähämiyätle. Ütkärelgän tikşerenülär kürsätkänçä, yörü arqasında döres êşläwçe organizmnıñ immunitetı da arta.

Daimi yörüneñ barı gäwdägä genä tügel, ruxıbız öçen dä faydalı buluın belderü kiräk. Yörü waqıtında bülenep çığuçı êndorfin gormonı bäxet däräcäsen kütärä häm stressnı kimetä. Monnan tış, kön sayın cäyäw yörü näticäsendä tärtipkä salınğan sistemalarıbız tağın da sıyfatlı yoqı täêmin itä. Yal itkän gäwdä häm çistarğan zihen belän yaña könne başlaw üzebezne yaxşı xis itü öçen bezgä forsat birä. Duslar yäisä ğailäbez belän bergäläp yörü isä sośial’ bäyläneşlärebezne köçäytergä yärdäm itä.  

Xäzerge waqıtta kesä telefonı häm aqıllı säğat’lär här kön cäyäw yörü waqıtıbız yäisä adımnarıbız sanın isäpli. Monnan alda sanap kitkän faydalarğa östäp “daimi cäyäw yörim, çönki köndälek adım sanın sośial’ mediada urtaqlaşam” maddäsen dä östäp quyarğa bula.